കരുനാഗപ്പള്ളി: മകളുമായി ബൈക്കില്‍ വന്ന ദമ്പതികളെ വാഗണര്‍ കാറിലെത്തിയ മദ്യപസംഘം ആക്രമിച്ചു. ബിയര്‍ കുപ്പി കൊണ്ടുള്ള ടിയേറ്റ യുവതിയെ കരുനാഗപ്പള്ളി താലൂക്കാശുപത്രിയില്‍ പ്രവേശിപ്പിച്ചു. സംഭവത്തില്‍ രണ്ടുപേരെ പൊലിസ് പിടികൂടി. കല്ലേലിഭാഗം ഭാരതിമന്ദിരത്തില്‍ ജയകുമാര്‍ (30), കോളശ്ശേരി വീട്ടില്‍ ഷാജഹാന്‍ (35) എന്നിവരെയാണ് പൊലിസ് അറസ്റ്റ് ചെയ്തത്. സംഘത്തിലെ ഇവരുടെ സുഹൃത്തായ ചേപ്പാട് സ്വദേശിയും സൈനികനുമായ സന്തോഷ് കുമാര്‍ ഒളിവിലാണ്.
കാറുമായി മുങ്ങിയ ഇയാള്‍ക്കെതിരെ എസ്.ഐ.വിജയകുമാറിന്റെ നേതൃത്വത്തില്‍ അന്വേഷണം ഊര്‍ജ്ജിതമാക്കി. കഴിഞ്ഞ ദിവസം രാത്രി 10ന് ആയിരുന്നു സംഭവം. കരുനാഗപ്പള്ളി സപ്ലൈസ്‌കോ മാവേലി നീതി മെഡിക്കല്‍ സ്റ്റോറിലെ ഫാര്‍മസിസ്റ്റും ജീവനക്കാരിയുമായ മഞ്ചു (37), ഭര്‍ത്താവ് സതീശന്‍ (45) എന്നിവര്‍ക്കാണ് മദ്യപസംഘത്തിന്റെ ആക്രമണത്തില്‍ പരുക്കേറ്റത്.
കല്ലേലിഭാഗത്തുള്ള ബന്ധുവീട്ടില്‍ പോയി കുട്ടിയേയും കൂട്ടി തിരികെ വാടകവീടായ ആലുംമൂട്ടിലേക്ക് വരുന്ന വഴിയില്‍ കേരളാ ഫീഡ്‌സ് കാലി തീറ്റ ഫാക്ടറിക്ക് സമീപം വച്ച് ബൈക്കിനെ പിന്‍തുടര്‍ന്ന് എത്തിയ മദ്യപസംഘം അസഭ്യം പറയുകയും മദ്യം ശരീരത്ത് ഒഴിക്കുകയും മദ്യകുപ്പി കൊണ്ട് യുവതിയുടെ വലത് തോളില്‍ അടിക്കുകയുമായിരുന്നു.
ഉടന്‍ വിവരമറിഞ്ഞെത്തിയ പൊലിസ് സംഘത്തിലെ രണ്ട് പേരെ പിടികൂടുകയായിരുന്നു.