തിരുവനന്തപുരം: ഉപതെരഞ്ഞെടുപ്പില്‍ ജനങ്ങളെ ബുദ്ധിമുട്ടിക്കുന്ന തരത്തിലുള്ള പ്രചാരണ കോലഹങ്ങളില്‍ ഇടപെട്ട് മുഖ്യ തെരഞ്ഞെടുപ്പ് ഓഫീസര്‍ ടിക്കാറാം മീണ. തെരഞ്ഞെടുപ്പ് പ്രചാരണം പല സ്ഥലങ്ങളിലും അതിരു വിടുന്നതായി ശ്രദ്ധയില്‍പ്പെട്ടിട്ടുണ്ടെന്നും ഇതിനെതിരെ നടപടിയെടുക്കണമെന്നും ആവശ്യപ്പെട്ട് ഡി.ജി.പിയ്ക്കും അഞ്ച് ജില്ലാ കലക്ടര്‍മാര്‍ക്കും നിര്‍ദേശം നല്‍കി.

രാഷ്ട്രീയ പാര്‍ട്ടികള്‍ തെരഞ്ഞെടുപ്പ് ചട്ടങ്ങള്‍ ലംഘിച്ച് യോഗവും പ്രചാരണ പരിപാടികളും നടത്തുന്നതിനാല്‍ ബുദ്ധിമുട്ട് നേരിടുന്നതായി കാട്ടി നിരവധി പരാതികള്‍ ലഭിച്ചതിന്റെ അടിസ്ഥാനത്തിലാണ് നിര്‍ദേശം നല്‍കിയതെന്ന് അദ്ദേഹം പറഞ്ഞു.
രാത്രി വൈകി അനുവദനീയമായതിലും കൂടുതല്‍ ശബ്ദത്തില്‍ ഉച്ചഭാഷിണികള്‍ പ്രവര്‍ത്തിപ്പിക്കുന്നതായും പാര്‍ട്ടികള്‍ യോഗങ്ങള്‍ നടത്തുന്നതിനാല്‍ ദേശീയപാതയില്‍ ഉള്‍പ്പെടെ ഗതാഗത തടസം ഉണ്ടാകുന്നതായും പരാതികള്‍ ലഭിച്ചു.

തെരഞ്ഞെടുപ്പ് കമ്മിഷന്‍ അടിയന്തരമായി ഇടപെടണമെന്നായിരുന്നു വിവിധ ജില്ലകളില്‍നിന്നുള്ള പരാതിക്കാരുടെ ആവശ്യം. പരാതികളില്‍ കഴമ്പുണ്ടെന്നു ബോധ്യപ്പെട്ട സാഹചര്യത്തിലാണ് നടപടി എടുക്കാന്‍ നിര്‍ദേശം നല്‍കിയത്. തെരഞ്ഞെടുപ്പ് ചട്ടങ്ങള്‍ ലംഘിക്കപ്പെടുന്നില്ലെന്നു പൊലിസ് ഉറപ്പുവരുത്തണമെന്നും നിയമം ലംഘിക്കുന്നവര്‍ക്കെതിരെ കര്‍ശന നടപടി സ്വീകരിക്കണമെന്നുമാണ് ഡി.ജി.പിയോട് ആവശ്യപ്പെട്ടിരിക്കുന്നത്. ഇതേ തുടര്‍ന്ന് ഡി.ജി.പി കര്‍ശന നടപടി സ്വീകരിക്കാന്‍ എല്ലാ എസ്.പിമാര്‍ക്കും നിര്‍ദേശം നല്‍കി.