കൊച്ചി: കെ.എസ്.ആര്‍.ടി.സി ബസ് സ്റ്റാന്‍ഡ് നോര്‍ത്ത്, സൗത്ത് റയിവേ സ്‌റ്റേഷന്‍, ഓവര്‍ ബ്രിഡ്ജ്, തേവര ബസ് സ്റ്റാന്‍ഡ് എന്നിവിടങ്ങള്‍ കേന്ദ്രീകരിച്ച് കഞ്ചാവ് മൊത്തവ്യാപാരം നടത്തുന്നയാളെ കൊച്ചി സിറ്റി ക്രൈം ഡിറ്റാച്ച്‌മെന്റ് അസി. കമ്മിഷണര്‍ ബിജി ജോര്‍ജിന്റെ നേതൃത്വത്തിലുള്ള ഷാഡോ സംഘം പിടികൂടി. 

ഇയാളില്‍നിന്നു വില്‍പന നടത്തിയിരുന്ന 1.2 കിലോഗ്രാം കഞ്ചാവ് പിടിച്ചെടുത്തു. പാലാരിവട്ടം സ്വദേശി ഇല്ലിക്കല്‍ വീട്ടില്‍ ശ്രീകുട്ടന്‍ (23) ആണ് പൊലിസ് പിടിയിലായത്.
തമിഴ്‌നാട്ടിലെ നാമക്കല്ലില്‍നിന്നു കിലോയ്ക്ക് 10,000 രൂപയ്ക്കു ശേഖരിക്കുന്ന മുന്തിയ ഇനത്തിപ്പെട്ട കഞ്ചാവ് 20,000 രൂപയ്ക്കാണ് ഇയാള്‍ മൊത്തക്കച്ചവടം നടത്തിയിരുന്നത്. അര കിലോയുടെ പാക്കറ്റുകളിലാക്കിയായിരുന്നു വില്‍പന. നഗരത്തിലെ ലോഡ്ജുകളില്‍ ദിവസവാടകയ്ക്കു താമസിച്ചായിരുന്നു ഇടനിലക്കാര്‍ക്ക് കഞ്ചാവ് എത്തിച്ചിരുന്നത്.
പൊലിസ്, എക്‌സൈസ് പരിശോധന ഒഴിവാക്കാന്‍ അന്യസംസ്ഥാന ലോറികളില്‍ മാറി, മാറി കയറിയാണ് ഇയാള്‍ തമിഴ്‌നാട്ടില്‍നിന്നു സ്റ്റോക്ക് എത്തിച്ചിരുന്നത്. മുന്തിയ ഇനത്തില്‍പ്പെട്ട കഞ്ചാവ് എത്തിക്കുന്നതിനാല്‍ ഇടനിലക്കാര്‍ക്കിടയില്‍ ഇയാളുടെ കഞ്ചാവിന് വന്‍ ഡിമാന്റാണ് ഉണ്ടായിരുന്നത്. കഴിഞ്ഞ ദിവസം പിടിയിലായ ഇടനിലകാരനില്‍നിന്നാണ് ഇയാളെ പറ്റിയുള്ള സൂചന ലഭിച്ചത്.
ഷാഡോ എസ്.ഐ ഹണി കെ ദാസ്, സൗത്ത് എസ്.ഐ ദ്വജേഷ്, സി.പി.ഒമാരായ സാനു, സനോജ്, വിശാല്‍, ശ്യാം, സുനില്‍, രാഹുല്‍, ഷാജി, രാഹുല്‍ എന്നിവര്‍ ചേര്‍ന്നാണു പ്രതിയെ പിടികൂടിയത്.