കോഴിക്കോട്: നഗരത്തെ വിറപ്പിച്ച് വീണ്ടും പിടിച്ചുപറി. ശ്രീകണ്‌ഠേശ്വരം ക്ഷേത്ര ദര്‍ശനം കഴിഞ്ഞ് മടങ്ങുകയായിരുന്ന യുവാവിന്റെ സ്വര്‍ണ ബ്രേസ്‌ലെറ്റ് മോഷ്ടിക്കാന്‍ ശ്രമിക്കുന്നതിനിടെ ഒരാള്‍ പിടിയിലായി. കല്ലായ് പള്ളിക്കണ്ടി നൈനാംവളപ്പ് എസ്.വി ഹൗസില്‍ ജാസറാണ് (28) പിടിയിലായത്. ഇന്നലെ വൈകീട്ട് മൂന്നോടെയാണ് സംഭവം. സിവില്‍സ്റ്റേഷനില്‍ താമസിക്കുന്ന പി. അക്ഷയ്‌ലാലിന്റെ സ്വര്‍ണ ബ്രേസ്‌ലെറ്റാണ് പ്രതി മോഷ്ടിക്കാന്‍ശ്രമിച്ചത്. ക്ഷേത്ര ദര്‍ശനം കഴിഞ്ഞ് കോറണേഷന്‍ തിയറ്ററിന് സമീപത്തു കൂടി മാനാഞ്ചിറയിലേക്ക് നടന്നു പോകുന്നതിനിടെ പിന്തുടര്‍ന്നെത്തിയ പ്രതി പിടിച്ചുപറിക്കാന്‍ ശ്രമിക്കുകയായിരുന്നു. അക്ഷയ് ബഹളം വെച്ചതോടെ രക്ഷപ്പെടാന്‍ ശ്രമിച്ച പ്രതിയെ നാട്ടുകാര്‍ പിടികൂടി പൊലിസില്‍ ഏല്‍പിച്ചു.
മുമ്പ് ഇതെ സ്ഥലത്ത് നിന്നും പിടിച്ചുപറി ശ്രമം നടത്തിയ പ്രതികളെ നാട്ടുകാര്‍ ചേര്‍ന്ന് പിടികൂടിയിരുന്നു. കൂടാതെ നഗരത്തിന്റെ വിവിധ ഭാഗങ്ങളില്‍ നിന്നും അടുത്തിടെയായി നിരവധി പേരുടെ സ്വര്‍ണാഭരങ്ങളും വിലപ്പെട്ട വസ്തുക്കളും പിടിച്ചു പറിക്കുന്നുണ്ടെന്ന പരാതിയും ഉയര്‍ന്നിട്ടുണ്ട്.