മഞ്ചേരി: പൊതുയിടങ്ങളില്‍ നിയമ വിരുദ്ധമായി സ്ഥാപിച്ച ഫ്‌ളക്‌സ് ബോര്‍ഡുകളും പരസ്യങ്ങളും കൊടിതോരണങ്ങളും മുപ്പതിനകം മാറ്റണമെന്ന ഹൈകോടതി ഉത്തരവ് നടപ്പിലാക്കാതെ മഞ്ചേരി നഗരസഭ. നഗരസഭയില്‍ പ്രധാന റോഡുകളിലെ പരസ്യങ്ങളും കൊടിതോരണങ്ങളും മാത്രമാണ് സമയപരിധി കഴിഞ്ഞ് 12 ദിവസം പിന്നിട്ടിട്ടും മാറ്റിയത്.
ബോര്‍ഡുകള്‍ നീക്കം ചെയ്തില്ലെങ്കില്‍ തദ്ധേശ സ്വയം ഭരണ സ്ഥാപനങ്ങളിലെ സെക്രട്ടറിമാരും ഫീല്‍ഡ് സ്റ്റാഫുകളും ഉത്തരവാദികളാകുമെന്നും കോടതി ഉത്തരവിലുണ്ട്. പാണ്ടിക്കാട് റോഡില്‍ പയ്യനാട് മുതല്‍ പൊതുനിരത്തിലേക്ക് തള്ളിനില്‍ക്കുന്ന ബോര്‍ഡുകള്‍ നീക്കം ചെയ്യാന്‍ ബന്ധപ്പെട്ടവര്‍ നടപടി സ്വീകരിച്ചിട്ടില്ല.
ദേശീയ, സംസ്ഥാന പാതകളില്‍ യാതൊരു നിയന്ത്രണവും ഇല്ലാതെയാണ് ബോര്‍ഡുകള്‍ സ്ഥാപിച്ചിരിക്കുന്നത്. പൊതുയിടങ്ങളില്‍ സ്ഥാപിച്ച ബോര്‍ഡ് നീക്കം ചെയ്യാന്‍ അതാത് കമ്പനികളില്‍ നിന്ന് ചെലവും പിഴയും ഈടാക്കാമെന്നും നിയമനടപടികള്‍ സ്വീകരിക്കാമെന്നും സിംഗിള്‍ ബെഞ്ച് പുറപ്പെടുവിപ്പിച്ച ഉത്തരവിലുണ്ട്. എന്നാല്‍ വാഹനങ്ങള്‍ക്കും യാത്രക്കാര്‍ക്കും കാഴ്ച മറക്കും വിധം തടസം സൃഷ്ടിച്ചിട്ടും ബോര്‍ഡ് സ്ഥാപിച്ചവര്‍ക്കെതിരേ നടപടിയൊന്നുമുണ്ടായിട്ടില്ല. പാണ്ടിക്കാട് റോഡിലെ സീതി ഹാജി ബസ് സ്റ്റാന്‍ഡിന് പരിസരത്തും എന്‍.എസ്.എസ് കോളജ് റോഡിലും ബോര്‍ഡുകളും സ്തൂപങ്ങളും കൊടിതോരണങ്ങളും വാഹനങ്ങള്‍ക്ക് പ്രയാസം സൃഷ്ടിക്കും വിധമാണ് സ്ഥാപിച്ചിട്ടുള്ളത്. ഇത്തരത്തില്‍ നൂറുകണക്കിന് പരസ്യബോര്‍ഡുകളാണ് ഇപ്പോഴും നീക്കം ചെയ്യാതെ കിടക്കുന്നത്. മാനദണ്ഡങ്ങള്‍ കാറ്റില്‍ പറത്തി പരസ്യങ്ങള്‍ പതിക്കാന്‍ എല്ലാ രാഷ്ട്രീയ പാര്‍ട്ടികളും മത്സരിക്കുന്നതിനാല്‍ പരാതിപ്പെടാന്‍ ആരും തയാറാകുന്നില്ല. സ്വകാര്യ വ്യക്തികള്‍ക്കും സ്ഥാപനങ്ങള്‍ക്കും പൊതുനിരത്തുകളില്‍ പരസ്യബോര്‍ഡുകളില്‍ സ്ഥാപിക്കണമെങ്കില്‍ മുന്‍കൂട്ടി അനുമതി വാങ്ങണമെന്നാണ് ചട്ടമെങ്കിലും ലംഘിക്കപ്പെടുകയാണ്. അനുമതിക്കുള്ള അപേക്ഷകള്‍ പോലും സമര്‍പ്പിക്കാതെയാണ് പലരും പരസ്യങ്ങള്‍ ചെയ്യുന്നത്. പരസ്യബോര്‍ഡുകള്‍ സ്ഥാപിക്കുന്ന ഇനത്തില്‍ തദ്ദേശ സ്ഥാപനങ്ങളില്‍ അടവാക്കേണ്ട നികുതിയടക്കാന്‍ മടിക്കുന്നതോടെ വന്‍ തുകയാണ് അതാത് തദ്ദേശ സ്ഥാപനങ്ങള്‍ക്ക് നഷ്ടമാകുന്നത്.