കൊട്ടിയം(കൊല്ലം): പി.എസ്.സി വെബ്‌സൈറ്റ് തകരാര്‍ പരിഹരിക്കാനായി മൂന്നു ദിവസം വണ്‍ടൈം രജിസ്‌ട്രേഷന്‍  നിര്‍ത്തിവയ്ക്കുന്നു. 23 മുതല്‍ രജിസ്‌ട്രേഷന്‍ നിര്‍ത്തിവയ്ക്കുന്നത്.
വെബ്‌സൈറ്റിലെ തിരക്ക് കാരണം സേവനങ്ങള്‍ക്ക് ഭംഗം വന്നതാണ് സെര്‍വര്‍ തകരാര്‍ പരിഹരിക്കാന്‍ പി.എസ്.സിയെ നിര്‍ബന്ധിതമാക്കിയത്. നിരവധി പ്രധാന അപേക്ഷകളും എല്‍.ഡി.സി ഹാള്‍ടിക്കറ്റും ഡൗണ്‍ലോഡ് ചെയ്യുന്ന സമയത്താണ് പി.എസ്.സിയുടെ തകരാര്‍ പരിഹരിക്കുന്നത് എന്നത് പ്രശ്‌നത്തിന്റെ ഗൗരവം വര്‍ധിപ്പിക്കുന്നു. ഈമാസം ആദ്യ ആഴ്ച തന്നെ വെബ്‌സൈറ്റ് തകരാറിലായിരുന്നു. സൈറ്റിലെ വണ്‍ടൈം രജിസ്‌ട്രേഷന്‍ ഭാഗമാണ് പലര്‍ക്കും കിട്ടാതിരുന്നത്.
എന്നാല്‍ ജില്ലാതല ലാസ്റ്റ് ഗ്രേഡ് അടക്കമുള്ള പരീക്ഷകള്‍ക്ക് അപേക്ഷകള്‍ അയക്കാനുള്ളവര്‍ വെബ്‌സൈറ്റിന്റെ പണിമുടക്കു കാരണം വലഞ്ഞു. ഇതിന്റെ അപേക്ഷ അയക്കാനുള്ള അവസാന തിയതി 14 ആയിരുന്നു. വ്യാപക പരാതിയെ തുടര്‍ന്ന് ആ തിയതി 21 ആക്കി പുതുക്കി നിശ്ചയിച്ചു.
റവന്യൂ വകുപ്പില്‍ വില്ലേജ് ഫീല്‍ഡ് അസിസ്റ്റന്റ്, കമ്പനി- ബോര്‍ഡ്-കോര്‍പ്പറേഷന്‍ ലാസ്റ്റ് ഗ്രേഡ് എന്നീ പരീക്ഷകള്‍ക്കും ഇതിനിടെ അപേക്ഷ ക്ഷണിച്ചു.
ഇക്കഴിഞ്ഞ 17ന് നടന്ന തിരുവനന്തപുരം, മലപ്പുറം എല്‍.ഡി.സി പരീക്ഷയുടെ ഹാള്‍ടിക്കറ്റും വെബ്‌സൈറ്റില്‍ വന്നിരുന്നു. ഇതും വണ്‍ടൈം രജിസ്‌ട്രേഷന്‍ ലിങ്കിലെത്തിയാലേ ഡൗണ്‍ലോഡ് ചെയ്യാന്‍ സാധിക്കൂ.
 തുടര്‍ന്ന് ഹാള്‍ടിക്കറ്റ് എടുക്കാനായി രണ്ട് ദിവസം ലാസ്റ്റ് ഗ്രേഡ് തസ്തികയിലേക്ക് അപേക്ഷ സ്വീകരിക്കുന്നത് പി.എസ് സി നിര്‍ത്തിവച്ചു.
വേണ്ടത്ര ശേഷിയില്ലാത്ത സെര്‍വറുകള്‍ ഉപയോഗിക്കുന്നതാണ് കാരണമെന്ന് ഒടുവില്‍ പി.എസ്.സിക്ക് തന്നെ ബോധ്യമായി. ഇതേതുടര്‍ന്നാണ് അടിയന്തിരമായി 23 മുതല്‍ മൂന്നു ദിവസം വണ്‍ടൈം രജിസ്‌ട്രേഷന്‍ നിര്‍ത്തിവച്ച് പോരായ്മകള്‍ പരിഹരിക്കാന്‍ പി.എസ്.സി തീരുമാനിച്ചത്.
അപേക്ഷകള്‍ അയക്കാനാകില്ലെന്ന് മാത്രമല്ല ജൂലൈ ഒന്നിന് നടക്കുന്ന കൊല്ലം, തൃശൂര്‍, കാസര്‍കോട് ജില്ലകളിലെ പരീക്ഷ എഴുതാന്‍ ഹാള്‍ടിക്കറ്റ് ഡൗണ്‍ലോഡ് ചെയ്യുന്നത് ഈ ദിവസങ്ങളില്‍ തടസപ്പെടുമെന്നാണ് സൂചന.