തിരുവനന്തപുരം: പകര്‍ച്ചപ്പനി നിയന്ത്രണ വിധേയമാണെന്നും മരണ നിരക്ക് കുറഞ്ഞിട്ടുണ്ടെന്നും ആരോഗ്യ വകുപ്പ് മന്ത്രി കെ.കെ ശൈലജ. മെഡിക്കല്‍ കോളജിലെ രണ്ടാമത്തെ പനി വാര്‍ഡും അത്യാഹിത വിഭാഗത്തില്‍ 24 മണിക്കൂറും പ്രവര്‍ത്തിക്കുന്ന ലാബും ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.
ആരോഗ്യ വകുപ്പിന്റെ ചിട്ടയായ പ്രവര്‍ത്തനത്തിലൂടെ പകര്‍ച്ചപ്പനി വ്യാപിക്കുന്നത് തടയാന്‍ കഴിഞ്ഞിട്ടുണ്ടെന്ന് മന്ത്രി പറഞ്ഞു. കാലാവസ്ഥാ വ്യതിയാനത്തെ തുടര്‍ന്ന് പകര്‍ച്ച വ്യാധികള്‍ കൂടുമെന്ന് നേരത്തെ കണ്ടെത്തിയതിനാല്‍ ആരോഗ്യ വകുപ്പ് മുന്നൊരുക്കങ്ങള്‍ നടത്തി.
സബ് സെന്റര്‍ മുതല്‍ മെഡിക്കല്‍ കോളജുകള്‍ വരെയുള്ളവ ചാര്‍ട്ട് തയ്യാറാക്കി പുന:പരിശോധന നടത്തി.
ആശുപത്രികളില്‍ മികച്ച ചികിത്സാ സൗകര്യങ്ങളും മരുന്നുകളുടെ ലഭ്യതയും ഉറപ്പാക്കിയിരുന്നു. പകര്‍ച്ച വ്യാധി തടയാനായി നടപ്പാക്കിയ ഹെല്‍ത്തി കേരള ക്യാംപൈനും ഫലപ്രദമായി.  രോഗികള്‍ക്ക് മികച്ച ചികിത്സ ലഭ്യമാക്കുകയാണ് പ്രധാന ലക്ഷ്യം. ഡോക്ടര്‍മാര്‍, നഴ്‌സുമാര്‍, ശുചീകരണ തൊഴിലാളികള്‍,എന്നിവരുടെ കൂട്ടായ ശ്രമഫലമാണ് കൂട്ടത്തോടെ മരിക്കുന്ന അവസ്ഥ ഒഴിവാക്കിയതെന്നും മന്ത്രി പറഞ്ഞു.