ശ്രീനഗര്‍: കശ്മിരിലെ ബാരാമുല്ലയില്‍ നടന്ന ഏറ്റുമുട്ടലില്‍ രണ്ട് ഹിസ്ബുല്‍ മുജാഹിദീന്‍ ഭീകരരെ സൈന്യം വധിച്ചു.  ബാസിത് അഹ്മദ് മിര്‍, ഗുല്‍സാര്‍ അഹ്മദ് എന്നിവരാണ് കൊല്ലപ്പെട്ടത്.
റാഫിയാബാദിനടുത്ത പസല്‍പോറ ഗ്രാമത്തില്‍ ഇന്നലെ പുലര്‍ച്ചെയാണ് സംഭവം. ഗ്രാമത്തിലെ ഒരു വീട്ടില്‍ ഭീകരര്‍ ഒളിച്ചുതാമസിക്കുന്നതായുള്ള രഹസ്യ വിവരത്തിന്റെ അടിസ്ഥാനത്തില്‍ ചൊവ്വാഴ്ച രാത്രി സി.ആര്‍.പി.എഫ്-ജമ്മു കശ്മിര്‍ പൊലിസ് സംയുക്ത സൈന്യം റെയ്ഡ് ആരംഭിച്ചിരുന്നു. രാത്രി ഒന്നും കണ്ടെത്താത്തതിനെ തുടര്‍ന്ന് തെരച്ചില്‍നിര്‍ത്തിയെങ്കിലും  ഭീകരര്‍ രക്ഷപ്പെടാതിരിക്കാന്‍ ഗ്രാമത്തിനു ചുറ്റും സൈന്യം കാവല്‍ ശക്തമാക്കിയിരുന്നു.
ഇന്നലെ രാവിലെ വീണ്ടും റെയ്ഡ് ആരംഭിച്ച സൈന്യം ഭീകരര്‍ താമസിച്ച വീട് വളഞ്ഞു. ഉടന്‍ ഭീകരര്‍ പൊലിസിനു നേരെ നിറയൊഴിച്ചതോടെയാണ് ഭീകരസാന്നിധ്യം വ്യക്തമായത്. തുടര്‍ന്ന് മണിക്കൂറുകള്‍ നീണ്ട ഏറ്റുമുട്ടലിലാണ് ഭീകരരെ വധിച്ചത്. സ്ഥലത്തു നിന്ന് രണ്ട് എ.കെ 47 തോക്കുകള്‍ അടക്കമുള്ള ആയുധങ്ങള്‍ കണ്ടെടുത്തിട്ടുണ്ട്.