ഫറോക്ക്: രാമനാട്ടുകര ഭവന്‍സ് പള്‍സര്‍ ലോ കോളജില്‍ നിരാഹാരമനുഷ്ഠിച്ചിരുന്ന എസ്.എഫ്.ഐ യൂനിറ്റ് വൈസ് പ്രസിഡന്റ് എം.പി ഫസല്‍ റഹ്്മാനെ അറസ്റ്റ് ചെയ്തു നീക്കി.
മൂന്നു ദിവസമായി നിരാഹാരമിരുന്ന ഇദ്ദേഹത്തിന്റെ ആരോഗ്യനില വഷളായതിനെ തുടര്‍ന്നു ഡോക്ടര്‍മാര്‍ പരിശോധന നടത്തിയ ശേഷമായിരുന്നു പൊലിസ് നടപടി. ഫറോക്ക് എസ്.ഐയുടെ നേതൃത്വത്തിലുള്ള പൊലിസാണ് ഫസല്‍ റഹ്മാനെ അറസ്റ്റ് ചെയ്ത് സ്വകാര്യ ആശുപത്രിയിലേക്ക് മാറ്റിയത്.
പകരം യൂനിറ്റ് ജോയിന്റ് സെക്രട്ടറി എം.എ നവനീത് മുകുന്ദ് നിരാഹാരം ആരംഭിച്ചിട്ടുണ്ട്.കഴിഞ്ഞ രണ്ടാഴ്ചയിലേറെയായി ഫീസ് ഘടനയിലുള്ള അപാകത ഉള്‍പ്പെടെ എട്ടിന ആവശ്യങ്ങള്‍ ഉന്നിയിച്ച് വിദ്യാര്‍ഥി സമരം നടന്നുവരികയാണ്. ചൊവ്വാഴ്ച നടന്ന എസ്.എഫ്.ഐ മാര്‍ച്ച് ലാത്തിച്ചാര്‍ജില്‍ കലാശിച്ചിരുന്നു.