തിരുവനന്തപുരം: യൂനിവേഴ്‌സിറ്റി കോളജ് കത്തിക്കുത്ത് കേസിലെ പ്രതി നസീം ഉള്‍പ്പെടെ ഏഴു പേരില്‍ നിന്ന് ഇന്നലെ കഞ്ചാവ് പിടികൂടിയിരുന്നു. കോടതിയില്‍ മുറിയില്‍ വച്ചാണ് കഞ്ചാവ് പൊതി കൈമാറിയതെന്ന് സമ്മതിച്ചിരിക്കുകയാണ് നസീം. ഇത് പിന്നീട് സോപ്പുകവറിലാക്കി ശരീരത്തില്‍ ഒളിപ്പിക്കുകയായിരുന്നു.

ഇന്നലെയാണ് നസീമിനെ കോടതിയില്‍ ഹാജരാക്കിയത്. അവിടേക്കാണ് കൂട്ടുകാരന്‍ കഞ്ചാവ് പൊതി എത്തിച്ചുകൊടുത്തത്. എന്നാല്‍ തിരിച്ചെത്തിയ ഉടനെ തന്നെ അധികൃതര്‍ ജയിലില്‍ മിന്നല്‍ പരിശോധന നടത്തി. പൂജപ്പുര സെന്‍ട്രല്‍ ജയിലിലെ 16 ബ്ലോക്കുകളിലും പരിശോധന നടത്തി. ഇതില്‍ ഏഴു പേരില്‍ നിന്നാണ് കഞ്ചാവ് പിടികൂടിയത്.

പരിശോധനയില്‍ ടി.പി ചന്ദ്രശേഖരന്‍ വധക്കേസിലെ പ്രതികളില്‍ നിന്ന് ബീഡിയും ലഹരിവസ്തുക്കളും പിടികൂടിയിട്ടുണ്ട്. സിജിത്തില്‍ നിന്നാണ് ലഹരിവസ്തുക്കള്‍ പിടികൂടിയത്. നടുവേദനയെത്തുടര്‍ന്ന് സിജിത്തിനെ ആശുപത്രിയില്‍ എത്തിച്ചിരുന്നു. ഇവിടെ നിന്നാവാം ഇവ കൈമാറിയതെന്നാണ് കരുതുന്നത്.