മുക്കം: പുതുതലമുറ തെരഞ്ഞെടുപ്പ് പ്രക്രിയയില്‍ സജീവമായി പങ്കെടുത്ത് ജനാധിപത്യത്തെ ശക്തിപ്പെടുത്തണമെന്ന് കോഴിക്കോട് അസി. കലക്ടര്‍ കെ.എസ് അഞ്ജു പറഞ്ഞു.
താമരശ്ശേരി താലൂക്ക് തെരഞ്ഞെടുപ്പ് വിഭാഗവും മണാശ്ശേരി എം.എ.എം.ഒ കോളജ് തെരഞ്ഞെടുപ്പ് ലിറ്റററി ക്ലബും ആസാദി യൂനിയനും സംയുക്തമായി വോട്ടേഴ്‌സ് ലിസ്റ്റില്‍ പേരുചേര്‍ക്കല്‍ കാംപയിനിന്റെ ഭാഗമായി സംഘടിപ്പിച്ച ബോധവല്‍ക്കരണ സെമിനാര്‍ ഉദ്ഘാടനം ചെയ്ത് സംസാരിക്കുകയായിരുന്നു അവര്‍.
വിദ്യാര്‍ഥികള്‍ തങ്ങളുടെ പേരുകള്‍ വോട്ടേഴ്‌സ് ലിസ്റ്റില്‍ ചേര്‍ക്കുന്നതോടൊപ്പം മറ്റുള്ളവരെ കൂടി അതില്‍ പങ്കാളികളാക്കാന്‍ ശ്രമിക്കണമെന്നും അസി. കലക്ടര്‍ പറഞ്ഞു. കോളജ് പ്രിന്‍സിപ്പല്‍ ടി.പി അബ്ബാസ് അധ്യക്ഷനായി. താമരശ്ശേരി താലൂക്ക് തഹസില്‍ദാര്‍ മുഹമ്മദ് റഫീഖ് ഓണ്‍ലൈന്‍ അപേക്ഷാപത്രം പൂരിപ്പിക്കല്‍ ഉദ്ഘാടനം ചെയ്തു.
സെമിനാറില്‍ താമരശ്ശേരി തെരഞ്ഞെടുപ്പ് ഡെപ്യൂട്ടി തഹസില്‍ദാര്‍ ശ്രീധരന്‍ മോഡറേറ്ററായി. താമരശ്ശേരി ഇലക്ഷന്‍ മാസ്റ്റര്‍ ട്രെയിനര്‍ കെ.സി അബ്ദുല്‍ വഹാബ് 'ജനാധിപത്യം ശക്തിപ്പെടുത്തുന്നതില്‍ വോട്ടര്‍മാരുടെ പങ്ക്' എന്ന വിഷയം അവതരിപ്പിച്ചു. അജ്മല്‍ മുഈന്‍ കൊടിയത്തൂര്‍, വൈസ് പ്രിന്‍സിപ്പല്‍ ഡോ. അബൂബക്കര്‍ മങ്ങാട്ടുചാലില്‍, പി.ടി.എ വൈസ് പ്രസിഡന്റ് റസാഖ് കൊടിയത്തൂര്‍ സംസാരിച്ചു.