ന്യൂഡല്‍ഹി: ഐ.എന്‍.എക്‌സ് മീഡിയ കേസില്‍ മുന്‍ കേന്ദ്രമന്ത്രിയും മുതിര്‍ന്ന കോണ്‍ഗ്രസ് നേതാവുമായ പി.ചിദംബരത്തിനും മകനുമെതിരേ സി.ബി.ഐ കുറ്റപത്രം സമര്‍പ്പിച്ചു. ഐ.എന്‍.എക്‌സ് മീഡിയയുടെ സ്ഥാപകരായ പീറ്റര്‍ മുഖര്‍ജി, ഇന്ദ്രാണി മുഖര്‍ജി എന്നിവരുമുള്‍പ്പെടെ 14 പേരെ പ്രതിചേര്‍ത്താണ് കുറ്റപത്രം സമര്‍പ്പിച്ചിരിക്കുന്നത്.

ഡല്‍ഹിയിലെ പ്രത്യേക സി.ബി.ഐ കോടതി ജഡ്ജി അജയ് കുമാര്‍ കുഹാര്‍ തിങ്കളാഴ്ച കുറ്റപത്രത്തിന്മേലുള്ള വാദം കേള്‍ക്കും. ക്രിമിനല്‍ ഗൂഢാലോചന, വഞ്ചന തുടങ്ങിയ കുറ്റങ്ങളാണ് കുറ്റപത്രത്തില്‍ ആരോപിച്ചിരിക്കുന്നത്. ഇന്ത്യന്‍ ശിക്ഷാ നിയമത്തിലെ 120 ബി, 420, 468, 471 എന്നിവയും കള്ളപ്പണമിടപാട് നിയമത്തിലെ ഒന്‍പത്, 13 (1) എന്നീ വകുപ്പുകളും പ്രകാരമാണ് കുറ്റം ചുമത്തിയിരിക്കുന്നത്. കേസില്‍ പി.ചിദംബരത്തെ ഈ മാസം 24 വരെ എന്‍ഫോഴ്‌സ്‌മെന്റ് ഡയരക്ടറേറ്റിന്റെ കസ്റ്റഡിയില്‍ വിട്ടിരുന്നു. 15 ദിവസത്തെ കസ്റ്റഡിയാണ് ആവശ്യപ്പെട്ടതെങ്കിലും കോടതി ഏഴു ദിവസം മാത്രം അനുവദിക്കുകയായിരുന്നു. കേസില്‍ കാര്‍ത്തിയെ സി.ബി.ഐ അറസ്റ്റ് ചെയ്തിരുന്നെങ്കിലും ഇപ്പോള്‍ ജാമ്യത്തിലാണ്.

 

 

 

 

 

 

 

 

ന്യൂഡല്‍ഹി: ഈ വര്‍ഷത്തെ സാമ്പത്തിക ശാസ്ത്രത്തിനുള്ള നൊബേല്‍ പുരസ്‌കാരം നേടിയ ഇന്ത്യന്‍ വംശജന്‍ അഭിജിത്ത് ബാനര്‍ജിയെ തള്ളി കേന്ദ്രമന്ത്രി പിയൂഷ് ഗോയല്‍. അഭിജിത്തിന് ഇടതു ചായ്‌വുള്ള നിലപാടുകളാണെന്നും അവയൊക്കെ ഇന്ത്യയിലെ ജനം തള്ളിയതാണെന്നും പിയൂഷ് ഗോയല്‍ പറഞ്ഞു.

കേന്ദ്രസര്‍ക്കാരിന്റെ സാമ്പത്തിക നയങ്ങള്‍ക്കെതിരേ അഭിജിത്ത് ബാനര്‍ജി നടത്തിയ പരാമര്‍ശങ്ങളാണ് മന്ത്രിയെ ചൊടിപ്പിച്ചതെന്നാണ് വിലയിരുത്തപ്പെടുന്നത്. നൊബേല്‍ നേടിയതിന് അഭിജിത്ത് ബാനര്‍ജിയെ അഭിനന്ദിക്കുന്നുവെന്നു പറഞ്ഞ ഗോയല്‍, അദ്ദേഹത്തിന്റെ ചിന്തകള്‍ നിങ്ങള്‍ക്കറിയാവുന്നതാണെന്നും അദ്ദേഹം പിന്തുണച്ച കോണ്‍ഗ്രസിന്റെ ന്യായ് പദ്ധതി ഇന്ത്യയിലെ ജനം തള്ളിയതാണെന്നും പറഞ്ഞു.

കേന്ദ്രമന്ത്രിയുടെ നിലപാടിനെ വിമര്‍ശിച്ച് ബംഗാളിലെ തൃണമൂല്‍ കോണ്‍ഗ്രസ് നേതാക്കള്‍ രംഗത്തെത്തിയിട്ടുണ്ട്. 

രാജ്യത്തിന് അഭിമാനമായ ഒരാളെക്കുറിച്ചുള്ള ബി.ജെ.പിയുടെ ഇത്തരം പരാമര്‍ശങ്ങള്‍ അവരുടെ ഇടുങ്ങിയ മനസ് വ്യക്തമാക്കുന്നതാണെന്നും തൃണമൂല്‍ നേതാക്കള്‍ ആരോപിച്ചു.