ബംഗളൂരു: കോപ്പിയടി തടയാന്‍ കര്‍ണാടകയിലെ ഒരു കോളജ് അധികൃതര്‍ കണ്ടെത്തിയ വഴി ഏവരെയും ചിരിപ്പിക്കുകയാണ്. കാര്‍ട്ടൂണ്‍ പെട്ടി കൊണ്ട തല മൂടിയാണ് വിദ്യാര്‍ഥികളെ പരീക്ഷയ്ക്കിരുത്തിയത്. മുന്‍പിലൂടെ മാത്രം കാണാന്‍ ഒരു തുള എടുത്താണ് എല്ലാവരുടെ തലയില്‍ പെട്ടിവച്ചു കൊടുത്തത്.

കര്‍ണാടകയിലെ ഹാവേരിയിലുള്ള ഭാഗത് പി.യു കോളജിലാണ് ചിരിപ്പിക്കുകയും ഒപ്പം പ്രതിഷേധത്തിനിടയാക്കുകയും ചെയ്ത സംഭവം. സി.സി.ടി.വി അടക്കമുള്ള പരീക്ഷണം നടത്തിയിട്ടും കുട്ടികള്‍ കോപ്പിയടിച്ചതോടെയാണ് കോളജ് അഡ്മിനിസ്‌ട്രേറ്റര്‍ പുതിയ വഴി കണ്ടുപിടിച്ചത്.

രാവിലെ പരീക്ഷയ്‌ക്കെത്തുമ്പോള്‍ എല്ലാവര്‍ക്കും കാര്‍ഡ്‌ബോര്‍ഡ് പെട്ടി നല്‍കുകയായിരുന്നു. മുന്‍ഭാഗത്തു മാത്രം ചതുരത്തിലുള്ള തുളയിട്ടായിരുന്നു പെട്ടി നല്‍കിയത്. അഡ്മിസ്‌ട്രേറ്റര്‍ സതീഷിന്റെ തലയിലാണ് ഈ 'ബുദ്ധി' ഉദിച്ചത്. ഇതിന്റെ ചിത്രം ഇദ്ദേഹം തന്നെ വാട്‌സ്ആപ്പില്‍ പങ്കുവയ്ക്കുകയും ചെയ്തു.

ഇതോടെ സംഭവം ശ്രദ്ധയില്‍പ്പെട്ട പ്രീ-യൂനിവേഴ്‌സിറ്റി എജ്യുക്കേഷന്‍ ഡെപ്യൂട്ടി ഡയരക്ടര്‍ എസ്.സി പീര്‍സാദെ കോളജിലേക്ക് കുതിച്ചെത്തി. വിദ്യാര്‍ഥികളെല്ലാം തലയില്‍ പെട്ടിവച്ച് പരീക്ഷയെഴുതുന്നതാണ് അദ്ദേഹം കണ്ടത്. ഉടന്‍ തന്നെ പെട്ടിയെല്ലാം ഒഴിവാക്കിക്കുകയും സതീഷിന് കാരണം കാണിക്കല്‍ നോട്ടീസ് നല്‍കുകയും ചെയ്തു.