പുല്‍വാമ: ജമ്മു കശ്മിരിലെ പുല്‍വാമ ജില്ലയില്‍ സൈന്യവുമായുണ്ടായ ഏറ്റുമുട്ടലില്‍ മൂന്ന് ലഷ്‌കര്‍ ത്വയ്ബ ഭീകരര്‍ കൊല്ലപ്പെട്ടു. ആറു മണിക്കൂറോളം നീണ്ട ഏറ്റുമുട്ടലിനൊടുവിലാണ് ഭീകരരെ വധിച്ചത്. ഏറ്റുമുട്ടലിനിടെ ഒരു സൈനിക ഉദ്യോഗസ്ഥന് പരുക്കേല്‍ക്കുകയും ചെയ്തിട്ടുണ്ട്.

കകപൊറ മേഖലയില്‍ മൂന്ന് ഭീകരര്‍ ഒളിച്ചിരിക്കുന്നതായി രഹസ്യവിവരം ലഭിച്ചതിന്റെ അടിസ്ഥാനത്തിലാണ് സൈന്യം തിരച്ചില്‍ ആരംഭിച്ചത്. ബുധനാഴ്ച്ച വൈകുന്നേരത്തോടെ ആരംഭിച്ച ഏറ്റുമുട്ടല്‍ ഇന്നു പുലര്‍ച്ചയോടെയാണ് അവസാനിച്ചത്. അടുത്തിടെ ലഷ്‌കര്‍ ത്വയ്ബയില്‍ ചേര്‍ന്ന മൂന്ന് യുവാക്കളാണ് കൊല്ലപ്പെട്ടതെന്നും മജീദ് മിര്‍, ഷാരിഖ് അഹമ്മദ്, ഇര്‍ഷാദ് അഹമ്മദ് എന്നിവരാണ് മരിച്ചതെന്നും സൈനിക വക്താവ് അറിയിച്ചു.

മരിച്ചവരില്‍ നിന്ന് എ.കെ. 47 തോക്കുകളും വെടിക്കോപ്പുകളും കണ്ടെത്തിയിട്ടുണ്ട്. മൂന്നുദിവസത്തിനിടെ ഭീകരര്‍ക്കെതിരെ സൈന്യം നടത്തുന്ന രണ്ടാമത്തെ സൈനിക ഓപ്പറേഷന്‍ വിജയമാണിത്. ഇന്നലെ ബാരാമുള്ള ജില്ലയിലെ സോപോറില്‍ രണ്ടു ഭീകരരെ സൈന്യം വധിച്ചിരുന്നു.