റിയാദ്: രാജ്യത്തെ ഏറ്റവും വലിയ പരേഡുകളുമായി റിയാദ് സീസണിന്റെ ബോളിവാര്‍ഡ് സോണിനു തുടക്കമായി. വേഷ പ്രച്ഛന്നരായ 1500 ലധികം പ്രകടനക്കാരും, 25ഓളം ഫ്‌ളോട്ടുകളും അണിനിരന്ന രാജ്യത്തെ ഏറ്റവും വലിയ പരേഡ് നടത്തികൊണ്ടാണ് ബോളിവാര്‍ഡില്‍ റിയാദ് സീസണ് തുടക്കം കുറിച്ചത്.  രാജ്യത്തെ ഏറ്റവും വലിയ പരേഡും വെടിക്കെട്ടുകളും കാണാന്‍ നിരവധി പേരാണ് ബോളിവാര്‍ഡില്‍ എത്തിയത്.
രാത്രി 9 മണിമുതല്‍ ഒന്നര മണിക്കൂറോളം അന്താരാഷ്ട്ര കലാകാരന്മാര്‍ അവതരിപ്പിച്ച് വിവിധ കലാപ്രകടനങ്ങളെ ജനങ്ങള്‍ ഏറെ കരഘോഷത്തോടെയാണ് സ്വീകരിച്ചത്. 4 ലക്ഷം ചതുരശ്രമീറ്റര്‍ വിസ്തൃതിയിലുള്ള ബോളിവാര്‍ഡില്‍ വിവിധ പ്രായക്കാരുടെ ആസ്വാദനത്തിനായി വൈവിധ്യങ്ങളായ വിനോദപരിപാടികളാണ് ഒരുക്കിയിട്ടുള്ളത്. കൂടാതെ 30,000 പേരെ ഉള്‍കൊള്ളാവുന്ന മൂന്ന് തിയേറ്ററുകളിലായി നിരവധി വിനോദപരിപാടികള്‍ വേറെയും ഒരുക്കിയിട്ടുണ്ട്. സഊദി വിനോദ മേഖലയെ പ്രോത്സാഹിപ്പിക്കുകയും ടൂറിസം മേഖലയെ ശക്തിപ്പെടുത്തുകയുമാണ് പരിപാടിയുടെ ലക്ഷ്യം.