കാബൂള്‍: അഫ്ഗാനിസ്താനില്‍ ബാങ്കിന് നേരെ ചാവേറാക്രമണം. ആക്രമണത്തില്‍ 20 കൊല്ലപ്പെട്ടു. 50 ല്‍ അധികം പേര്‍ക്ക് ആക്രമണത്തില്‍ പരുക്കേറ്റു. ഹെല്‍മന്ത് പ്രവിശ്യയിലെ ലഷ്‌കര്‍ഗിലെ ന്യൂ കാബൂള്‍ ബാങ്കിന് നേരെയാണ് ആക്രമണമുണ്ടായത്. പ്രദേശിക സമയം 12 മണിക്കാണ് ആക്രമണമുണ്ടായത്.

ബാങ്കിന് മുമ്പില്‍ പാര്‍ക്ക് ചെയ്തിരുന്ന കാറില്‍ സൂക്ഷിച്ചിരുന്ന സ്‌ഫോടകവസ്തുക്കളാണ് പൊട്ടിത്തെറിച്ചത്. ആക്രമണത്തിന്റെ ഉത്തരവാദിത്തം ആരും ഏറ്റെടുത്തിട്ടില്ല. അഫ്ഗാനിലെ താലിബാന്‍ തീവ്രവാദികളെ അമര്‍ച്ച ചെയ്യാന്‍ രാജ്യാന്തര സുരക്ഷാ സഹായസേന തിരച്ചില്‍ നടത്തുന്ന മേഖലയാണ് ഹെല്‍മന്ത്.

അപകടത്തില്‍ പരുക്കേറ്റവരെ സമീപത്തുള്ള ആശുപത്രികളില്‍ പ്രവേശിപ്പിച്ചു.