പയ്യോളി:  മത്സരിച്ചോടിയ രണ്ട് ബസുകള്‍ പൊലിസ് കസ്റ്റഡിയിലെടുത്തു. പയ്യോളി ടൗണില്‍ വച്ച് നാട്ടുകാരാണ് ബസുകള്‍ തടഞ്ഞു പൊലിസിനെ ഏല്‍പിച്ചത്. കോഴിക്കോടുനിന്നും കണ്ണൂരിലേക്ക് പോകുന്ന ഗംഗോത്രി ബസും തൃശൂരില്‍നിന്നും കണ്ണൂരിലേക്ക് പോകുകയായിരുന്ന സിസി ബസുമാണ് പയ്യോളി പൊലിസ് കസ്റ്റഡിയിലെടുത്തത്.പയ്യോളി പൊലിസ് സ്റ്റേഷന് മുമ്പില്‍ പ്രവര്‍ത്തിച്ചിരുന്ന പഞ്ചിങ് സ്റ്റേഷന്‍ പ്രവര്‍ത്തനം നിലച്ചതാണ് ബസുകളുടെ മത്സരയോട്ടത്തിന് കാരണമെന്നാണ് നാട്ടുകാര്‍ പറയുന്നത്. പഞ്ചിങ് സ്റ്റേഷന്റെ ഉദ്ഘാടനം കഴിഞ്ഞ് ചുരുങ്ങിയ ദിവസങ്ങള്‍ മാത്രമാണ് ഇത് പ്രവര്‍ത്തിച്ചത്. തിരക്കേറിയ പയ്യോളി ബസ് സ്റ്റാന്‍ഡില്‍ ഡ്യൂട്ടിക്ക് പൊലിസ് ഇല്ല. ബസ് സ്റ്റാന്റില്‍ പ്രശ്‌നങ്ങള്‍ ഉണ്ടാകുമ്പോള്‍ നാട്ടുകാരാണ് പൊലിസില്‍ വിവരമറിയിക്കാറുള്ളത്.