#അബ്ദുസ്സലാം കൂടരഞ്ഞി

റിയാദ്: പ്രകൃതി വാതക മേഖലയില്‍ സഊദിയും യു.എ.ഇയും കൈകോര്‍ക്കുന്നു. ലോകത്തെ ഏറ്റവും വലിയ എണ്ണ കമ്പനിയായ സഊദി അരാംകോയും അറബ് മേഖലയിലെ മറ്റൊരു പ്രമുഖ എണ്ണ കമ്പനിയായ യു.എയുടെ അബൂദബി നാഷനല്‍ ഓയില്‍ കമ്പനിയും തമ്മിലാണ് പ്രകൃതി വാതക, ലിക്യുഫൈഡ് പ്രകൃതി വാതക മേഖലയില്‍ പുതിയ കരാറില്‍ ഏര്‍പ്പെട്ടത്. ഇതോടെ എണ്ണ മേഖലയില്‍ ലോകത്തെ മറ്റൊരു സംയുക്ത പദ്ധതിക്ക് കൂടി അറബ് മേഖലയില്‍ തുടക്കമായിരിക്കുയാണ്.

സഊദി അരാംകോ പ്രസിഡന്റും ചീഫ് എക്‌സിക്യൂട്ടീവുമായ അമീന്‍ നാസര്‍, യു.എ.ഇ സഹമന്ത്രിയും അഡ്‌നോക് ഗ്രൂപ്പ് സി.ഇ.ഒയുമായ ഡോ. സുല്‍ത്താല്‍ അല്‍ ജാബിര്‍ എന്നിവര്‍ അബുദാബിയിലെ അഡിപെകില്‍ നടന്ന ചടങ്ങിലാണ് കരാറില്‍ ഒപ്പിട്ടത്. ഇതോടൊപ്പം ഇരു കമ്പനികളും നിക്ഷേപ അവസരങ്ങള്‍ സംയുക്തമായി വിലയിരുത്തുന്നതിനും ധാരണയായി.

2040 ഓടെ ദ്രവീകൃത പ്രകൃതി വാതക ഉല്‍പാദനം കൂട്ടുന്നതിനുള്ള അഡ്‌നോകിന്റെ സമഗ്ര വാതക നയത്തിന് അബൂദബി സുപ്രിം പെട്രോളിയം കൗണ്‍സില്‍ അംഗീകാരം നല്‍കിയതിന് പിന്നാലെയാണ് സഊദി എണ്ണകമ്പനിയുമായി യു.എ.ഇ ദേശീയ എണ്ണക്കമ്പനി കരാറില്‍ ഏര്‍പ്പെട്ടത്. ദ്രവീകൃത പ്രകൃതി വാതക മേഖലയില്‍ നിന്നുള്ള വരുമാനം വര്‍ധിപ്പിക്കുക എന്ന ലക്ഷ്യത്തോടെയാണ് അറേബ്യന്‍ ഉപദ്വീപിലെ ഏറ്റവും വലിയ രണ്ട് ഊര്‍ജ ഉല്‍പാദക രാജ്യങ്ങളായ സഊദിയുടെയും യു.എ.ഇയുടെയും ദേശീയ എണ്ണകമ്പനികള്‍ തമ്മില്‍ കൈകോര്‍ക്കുന്നത്. അഡ്‌നോകിനും അരോംകോക്കും ഇടയിലെ സഹകരണം ഇരു രാജ്യങ്ങള്‍ക്കും ഊര്‍ജ സുരക്ഷയും സാമ്പത്തിക പുരോഗതിയും ഉറപ്പു വരുത്തുമെന്ന് ഡോ. സുല്‍ത്താല്‍ അല്‍ ജാബിര്‍ അഭിപ്രായപ്പെട്ടു.

പ്രകൃതി വാതക മേഖലയില്‍ പുതിയ സംവിധാനങ്ങള്‍ക്ക് കൂടുതല്‍ ശക്തി പകരുന്ന തീരുമാനമാണിതെന്നാണ് കരുതുന്നത്. ഇതിനകം 40 വര്‍ഷത്തെ അഡ്‌നോക്ക് പദ്ധതിക്കിടെ ലോകത്ത് ആവശ്യമായ പ്രകൃതി വാതക രംഗത്ത് രണ്ടു ശതമാനം ഇവര്‍ നല്‍കിയെന്നാണ് കണക്കുകള്‍. നിലവില്‍ ലോക വിപണിയില്‍ എല്‍ എന്‍ ജി ഉപയോഗം വാര്‍ഷികാടിസ്ഥാനത്തില്‍ നാല് ശതമാനം ഉയരുന്നതായാണ് കണക്കുകള്‍. ഇതിനാല്‍ തന്നെ ഈ മേഖലയിലെ രണ്ടു വന്‍കിട കമ്പനികളുടെ സഹകരണം കൂടുതല്‍ ഊര്‍ജ്ജം പകരും. 2035 ഓടെ ആഗോള തലത്തിലെ ലിക്വിഫൈഡ് നാച്ചുറല്‍ ഗ്യാസ് (എല്‍ എന്‍ ജി) ആവശ്യം വാര്‍ഷികാടിസ്ഥാനത്തില്‍ അഞ്ഞൂറ് മില്യണ്‍ ടണ്‍ ആയി വര്‍ധിക്കുമെന്നാണ് കണക്കുകള്‍. കഴിഞ്ഞ വര്‍ഷം ഇത് 300 മില്യണ്‍ ടണ്‍ ആയിരുന്നു.