തിരുവനന്തപുരം: മണ്ഡല മകരവിളക്ക് സീസണില്‍ നിലയ്ക്കല്‍ പമ്പ കെ.എസ്.ആര്‍.ടി.സി സര്‍വിസുകള്‍ മുഴുവന്‍ ഡിജിറ്റല്‍ സംവിധാനത്തില്‍ നടത്തുമെന്ന് ടോമിന്‍ ജെ. തച്ചങ്കരി.
നാളെ ഉച്ചയ്ക്ക് 12 മുതല്‍ മണ്ഡലകാല ചെയിന്‍ സര്‍വിസ് ആരംഭിക്കും. കൂടുതല്‍ ആവശ്യക്കാരുള്ളതിനാല്‍ കൂടുതല്‍ എ.സി ബസുകള്‍ സര്‍വിസിനായി ഉപയോഗിക്കും.
ഓണ്‍ലൈനായും നിലയ്ക്കലില്‍ 15 സെല്‍ഫ് കിയോസ്‌കുകളില്‍നിന്നും പതിനഞ്ച് കൗണ്ടറുകളില്‍ നിന്നും ബസ് ടിക്കറ്റുകള്‍ ലഭ്യമാകും. നിലയ്ക്കലില്‍നിന്ന് രണ്ടുവശത്തേക്കുമുള്ള ടിക്കറ്റ് ഒന്നിച്ചാണ് ലഭിക്കുക. എ.സി ബസുകള്‍ക്ക് ഇരുഭാഗത്തേക്കുമായി 150 രൂപയും നോണ്‍ എ.സി ബസുകള്‍ക്ക് 80 രൂപയുമാണ് നിരക്ക്.
ഉത്സവകാലത്ത് സര്‍ക്കാര്‍ അനുവദിച്ച 30 ശതമാനം നിരക്ക് ഉള്‍പ്പെടുത്തിയാണ് ഒരുഭാഗത്തേക്കുള്ള നിരക്ക് നോണ്‍ എ.സി ബസിന് 31 രൂപയില്‍നിന്ന് 40 രൂപയാകുന്നത്. സന്നിധാനത്ത് തീര്‍ഥാടകര്‍ക്ക് 48 മണിക്കൂര്‍ തങ്ങാവുന്ന നിലയിലാണ് ടിക്കറ്റിന്റെ കാലാവധി നിശ്ചയിച്ചിരിക്കുന്നത്.
സംസ്ഥാനത്തെ ആറ് ഡിപ്പോകളില്‍ നിന്നായി പമ്പയിലേക്ക് നേരിട്ടുള്ള ബസ് സര്‍വിസിന് നിലവിലെ നിരക്ക് തന്നെയാണ് ഈടാക്കുന്നത്. ഇതിന് പുറമെ നെടുമ്പാശ്ശേരി വിമാനത്താവളം, ചെങ്ങന്നൂര്‍ റെയില്‍വേ സ്റ്റേഷന്‍ എന്നിവ കേന്ദ്രീകരിച്ച് ശബരി ദര്‍ശന്‍ എന്ന പേരില്‍ പ്രത്യേക പാക്കേജും കെ.എസ്.ആര്‍.ടി.സി നടത്തുന്നുണ്ട്.
നെടുമ്പാശ്ശേരി എയര്‍പോര്‍ട്ടില്‍നിന്ന് തീര്‍ഥാടകരെ സ്വീകരിച്ച് എ.സി ബസില്‍ പമ്പ വരെയും തിരിച്ചും എത്തിക്കുകയും ഇവരുടെ ലഗേജിന് ക്ലോക്ക് റൂം സൗകര്യമൊരുക്കുകയും ചെയ്യുന്ന കുടിവെള്ളമുള്‍പ്പെടെയുള്ള പാക്കേജിന് 1,500 രൂപയും ചെങ്ങന്നൂര്‍ റെയില്‍വേ സ്റ്റേഷനില്‍നിന്ന് 900 രൂപയുമാണ് നിരക്ക്.