തിരുവനന്തപുരം: ഒരുവശത്ത് സമവായ ശ്രമങ്ങളുമായി സര്‍വകക്ഷി യോഗം വിളിച്ച് സര്‍ക്കാര്‍ മുന്നോട്ടു പോകുമ്പോള്‍ മറുവശത്ത് ശബരിമലയിലെ സുരക്ഷ ശക്തമാക്കാന്‍ പൊലിസ്. സായുധ സേനയും കമാന്‍ഡോകളും ഉള്‍പ്പെടെ നാലുഘട്ടങ്ങളിലായി 20,000 പൊലിസുകാരെ നിയോഗിക്കാന്‍ ഇന്നലെ ചേര്‍ന്ന പൊലിസ് ഉന്നതതല യോഗം തീരുമാനിച്ചു.
ആദ്യഘട്ടത്തിലെ 5,200 പൊലിസുകാരെയാണ് ഇന്ന് നിലയ്ക്കലും, പമ്പയിലും സന്നിധാനത്തും എരുമേലിയിലുമായി വിന്യസിക്കുക. സന്നിധാനത്തും നിലയ്ക്കലും ഓരോ ഐ.ജിമാര്‍ക്കും രണ്ട് എസ്.പിമാര്‍ക്കും വീതം ചുമതല നല്‍കി. മരക്കൂട്ടം, എരുമേലിയിലും ഓരോ എസ്.പിമാരുണ്ടാകും. തുലാമാസ പൂജസമയത്ത് സന്നിധാനത്തിന്റെ ചുമതല നല്‍കിയിരുന്ന ക്രൈംബ്രാഞ്ച് ഐ.ജി എസ്. ശ്രീജിത്തിനെയും ചിത്തിര ആട്ട വിശേഷത്തിന് ആര്‍.എസ്.എസുകാര്‍ക്ക് സൗകര്യമൊരുക്കിയെന്ന ആരോപണ വിധേയനായ തൃശൂര്‍ റേഞ്ച് ഐ.ജി എം.ആര്‍ അജിത്കുമാറിനെയും ഒഴിവാക്കി സന്നിധാനത്തില്‍ ഐ.ജി വിജയ് സാക്കറെയും പമ്പയില്‍ ഐ.ജി അശോക് യാദവിനെയും സുരക്ഷാക്രമീകരണങ്ങള്‍ക്ക് നേതൃത്വം നല്‍കാന്‍ നിയോഗിച്ചു.
സുരക്ഷാ നിയന്ത്രണ ചുമതല എ.ഡി.ജി.പി അനില്‍കാന്തിനും ഐ.ജി മനോജ് എബ്രഹാമിനും പൂര്‍ണ മേല്‍നോട്ട ചുമതല എ.ഡി.ജി.പി ആനന്ദകൃഷ്ണനുമായിരിക്കും. കാല്‍നടയായി എത്തുന്ന തീര്‍ഥാടകര്‍ക്ക് നാളെ രാവിലെ പതിനൊന്നോടെ നിലയ്ക്കലില്‍നിന്ന് പ്രവേശനം നല്‍കും. ഉച്ചയ്ക്ക് 12 മുതല്‍ മാത്രമേ തീര്‍ഥാടകരെ നിലയ്ക്കലില്‍നിന്ന് കെ.എസ്.ആര്‍.ടി.സി ബസുകളില്‍ പമ്പയിലേക്ക് പോകാന്‍ അനുവദിക്കൂ.
പ്രതിഷേധക്കാരെ തടയാനുള്ള നിയന്ത്രണങ്ങള്‍ കര്‍ശനമായി തുടരും. കഴിഞ്ഞ രണ്ടുതവണയും നട തുറന്നപ്പോള്‍ പൊലിസിന് കാര്യങ്ങള്‍ നിയന്ത്രിക്കാന്‍ ആയിരുന്നില്ലെന്ന് വന്‍ വിമര്‍ശനം ഉയര്‍ന്നിരുന്നു. ഈ സാഹചര്യത്തില്‍ പഴുതടച്ച സുരക്ഷാ സംവിധാനങ്ങളാകും സന്നിധാനത്ത് ഏര്‍പ്പെടുത്തുക.
നാലുഘട്ടങ്ങളിലായാണ് പൊലിസിനെ സന്നിധാനത്ത് വിന്യസിക്കുന്നത്. മകരവിളക്ക് സമയത്ത് 8,000 പൊലിസുകാരെ നിയോഗിക്കും. 50 വയസ് കഴിഞ്ഞവര്‍ ഉള്‍പ്പെടെ നാളെ 200 വനിതാ പൊലിസിനെയാണ് വിന്യസിക്കുന്നത്. കൂടാതെ വനിതാ ബറ്റാലിയനെയും വിന്യസിക്കും. ഇവരെ നാളെ പമ്പയിലാണ് വിന്യസിക്കുന്നത്.
ഇതര സംസ്ഥാനങ്ങളില്‍ നിന്നടക്കം എത്തുന്ന വനിതാ പൊലിസുകാരെ ആവശ്യമെങ്കില്‍ മാത്രം സന്നിധാനത്ത് വിന്യസിക്കും. ഇല്ലെങ്കില്‍ ചിത്തിര ആട്ടവിശേഷ സമയത്തേതുപോലെ അന്‍പത് വയസ് കഴിഞ്ഞ വനിതാ പൊലിസുകാരെയാകും സന്നിധാനത്ത് വിന്യസിക്കുക. 1,500 വനിതാ പൊലിസുകാരെ മണ്ഡല, മകര വിളക്ക് കാലത്ത് ശബരിമലയില്‍ വിന്യസിക്കും.
മാധ്യമ പ്രവര്‍ത്തകരെയും ദേവസ്വം, സര്‍ക്കാര്‍ ജീവനക്കാരെയും തിരിച്ചറിയല്‍ കാര്‍ഡ് പരിശോധിച്ചതിനുശേഷം ഇന്നു വൈകിട്ടോടെ സന്നിധാനത്തേയ്ക്ക് കടത്തിവിടും. ഇതുവരെ ഏതാണ്ട് എണ്ണൂറോളം യുവതികള്‍ ഓണ്‍ലൈനില്‍ ബുക്ക് ചെയ്തിട്ടുണ്ട്.
ആന്ധ്രയില്‍ നിന്നാണ് കൂടുതല്‍ യുവതികള്‍ ദര്‍ശന സമയം ബുക്ക് ചെയ്തിരിക്കുന്നത്. ദക്ഷിണേന്ത്യന്‍ സംസ്ഥാനങ്ങള്‍ക്ക് പുറമേ ഡല്‍ഹിയില്‍നിന്നും കൊല്‍ക്കത്തയില്‍നിന്നും യുവതികള്‍ തിരിച്ചറിയല്‍ രേഖകള്‍ നല്‍കി ഓണ്‍ലൈന്‍ ബുക്കിങ് നടത്തിയിട്ടുണ്ട്.
ശബരിമലയിലെ യുവതീ പ്രവേശനവുമായി ബന്ധപ്പെട്ട് പ്രതിഷേധം ഉയര്‍ന്നതിനാല്‍ എത്രപേര്‍ ദര്‍ശനത്തിനെത്തുമെന്ന് വ്യക്തമല്ല. യുവതികളുടെ കണക്കുകള്‍ പുറത്തുവിടരുതെന്ന കര്‍ശന നിര്‍ദേശമാണ് നല്‍കിയിട്ടുള്ളത്.