ലണ്ടന്‍: കശ്മിരിനെ പാകിസ്താന് ആവശ്യമില്ലെന്നും ഇന്ത്യയ്ക്കും നല്‍കരുതെന്നും പാക് ക്രിക്കറ്റ് താരം ശാഹിദ് അഫ്രീദി.
കശ്മിര്‍ സ്വതന്ത്രമായിരിക്കണം. പാകിസ്താനു നാലു പ്രവിശ്യകള്‍പോലും കൈകാര്യം ചെയ്യാന്‍ കഴിയുന്നില്ല. കശ്മിരികള്‍ കൊല്ലപ്പെടുന്നതു വേദനയുണ്ടാക്കുന്നതാണെന്നും അഫ്രീദി പറഞ്ഞു. ലണ്ടനില്‍ വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം.
കശ്മിര്‍ വിഷയത്തില്‍ പ്രതികരണവുമായി അഫ്രീദി നേരത്തെ രംഗത്തെത്തിയിരുന്നു. സ്വാതന്ത്ര്യത്തിന്റെ ശബ്ദം അടിച്ചമര്‍ത്തുന്നതിനായി കശ്മിരില്‍ നിരപരാധികള്‍ക്കു നേരെ വെടിയുതിര്‍ക്കുകയാണെന്നു കഴിഞ്ഞ ഏപ്രിലില്‍ അദ്ദേഹം സമൂഹമാധ്യമത്തില്‍ ആരോപിച്ചിരുന്നു. യു.എന്‍ ഉള്‍പ്പെടെയുള്ള സംഘടനകള്‍ വിഷയത്തില്‍ ഇടപെടാത്തത് എന്താണെന്നും താരം അന്നു ചോദിച്ചിരുന്നു.