പൂച്ചാക്കല്‍: തകര്‍ന്ന് കിടക്കുന്ന ചേര്‍ത്തല-അരൂക്കുറ്റി റോഡ് ഉടന്‍ സഞ്ചാരയോഗ്യമാക്കുമെന്ന്  എ.എം ആരിഫ് എം.എല്‍.എ. പ്രതിഷേധങ്ങള്‍ ശക്തമായ സാഹചര്യത്തിലാണ് ബുധനാഴ്ച വൈകുന്നേരം റോഡ് സന്ദര്‍ശിക്കുകയും നന്നാക്കാനുള്ള നടപടികള്‍ ഉടന്‍ സ്വീകരിക്കുമെന്നും എം.എല്‍.എ നാട്ടുകാര്‍ക്ക് ഉറപ്പ് നല്‍കിയത്.
  എക്‌സികൂട്ടീവ് എഞ്ചിനീയര്‍ തോമസ് ജോണ്‍, ഡി.പി.എം ദിലീപ് തുടങ്ങിയവരും ഒപ്പമുണ്ടായിരുന്നു.യാത്രക്കാര്‍ക്ക് ദുരിതമായി റോഡ് പൊട്ടിപ്പൊളിഞ്ഞ നിലയിലാണ്. ചെറുതും വലുതുമായ കുഴികളില്‍ അകപ്പെട്ട് അപകടങ്ങളുണ്ടാകുന്നത് പതിവ് കാഴ്ചയാണ്. തിരക്കുള്ളചേര്‍ത്തലഅരൂക്കുറ്റി  റോഡ് ഉള്‍പ്പെടെ പ്രധാന പാതകളെല്ലാം തകര്‍ന്നിരിക്കുകയാണ്. റോഡ് നിര്‍മാണം ഉടന്‍ ആരംഭിക്കണമെന്ന ആവശ്യവുമായി ആക്ഷന്‍ കൗണ്‍സിലും, യൂത്ത്‌കോണ്‍ഗ്രസ് അരൂക്കുറ്റി മണ്ഡലം കമ്മറ്റിയും, വിവിധ വായനാശലകളും ക്ലബുകളും രംഗത്ത് വന്നിരുന്നു.ഇതിനിടെയാണ് റോഡ് സന്ദര്‍ശിച്ച് എം.എല്‍.എ പ്രഖ്യാപനം നടത്തിയത്.
  നിരവധി വളവുകളും  റോഡിന് മതിയായ വീതിയില്ലാത്തതും അപകടങ്ങള്‍ വര്‍ദ്ധിക്കാന്‍   കാരണമായിരിക്കുകയാണ്. ചേര്‍ത്തലഅരൂര്‍,വൈറ്റില,ഇടക്കൊച്ചി,എറണാകുളം എന്നിവിടങ്ങളിലേക്ക്  കെ.എസ് ആര്‍.ടി. സി ബസ്സുകളടക്കം നൂറുകണക്കിന് ബസുകളാണ് ദിനേന ഇതുവഴി സര്‍വ്വീസ് നടത്തുന്നത്.  കൂടാതെ അരൂര്‍ വ്യവസായ മേഖലയിലേക്ക് പോകുന്ന അനേകം വാഹനങ്ങളും ഈ റോഡ് മാര്‍ഗ്ഗമാണ് പോകുന്നത്. മഴക്കാലമായതോടെ റോഡിന്റെ  മിക്ക ഭാഗങ്ങളും വലിയ ഗര്‍ത്തങ്ങള്‍ ഉണ്ടാവുകയും വെള്ളം കെട്ടികിടക്കുകയും ചെയ്യുന്നതിനാല്‍ രാത്രി കാലങ്ങളില്‍ ഇരുചക്ര വാഹനങ്ങള്‍ അപകടത്തില്‍ പെടുകയും നിരവധിപേര്‍ക്ക് പരിക്കുകള്‍ സംഭവിക്കുകയും ചെയ്തിട്ടുണ്ട്. വാഹനങ്ങളുടെ വര്‍ധനവും വീതികുറവും മൂലം അരൂക്കുറ്റി പാലംമുതല്‍ അരൂര്‍ വരെ യാത്രചെയ്യാന്‍ മണിക്കൂറുകള്‍ കാത്തുകിടക്കേണ്ടി വരികയും ചെയ്യുന്നു.