ഗുഡല്ലൂര്‍: മുതുമല കടുവാ സങ്കേതത്തിലെ അപ്പര്‍ കാര്‍കുടിയില്‍ തമ്പടിച്ചിരുന്ന ശല്യക്കാരായ കാട്ടാനകളെ താപ്പാനകളുടെ സഹായത്താല്‍ കാട്ടിലേക്ക് തുരത്തി.
 ദിവസങ്ങളായി മുതുമല, തെപ്പക്കാട്, കാര്‍കുടി, മസിനഗുഡി, നെല്ലാക്കോട്ട എന്നീ വനം വകുപ്പ് റെയ്ഞ്ചു പരിധിയിലുള്ള പ്രദേശങ്ങളിലെ ജനവാസ കേന്ദ്രങ്ങളില്‍ ഇറങ്ങി വ്യാപക നാശമാണ് കാട്ടാനകള്‍ വരുത്തിയിരുന്നത്.
വീടുകളും തകര്‍ക്കപ്പെട്ടിരുന്നു. വന്യമൃഗശല്യത്തിന് പരിഹാരം കാണാന്‍ വൈകുന്നതിനെതിരേ പ്രതിഷേധം ശക്തമായതോടെയാണ് താപ്പാനകളെ ഉപയോഗിച്ച് കാട്ടാനകളെ വനത്തിലേക്ക് തുരത്തിയത്. തെപ്പക്കാട് ആന വളര്‍ത്തു കേന്ദ്രത്തിലെ പരിശീലനം നേടിയ 5 ആനകളുടെ സഹായത്തോടെയാണ് കാട്ടാനകളെ കാട്ടിലേക്ക് തുരത്തിയത്. കാട്ടാനകള്‍ വീണ്ടുമെത്തുന്നത് തടയാന്‍ വനാതിര്‍ത്തികളില്‍ നിരീക്ഷണം ഏര്‍പ്പെടുത്തിയിട്ടുണ്ട്.