മുംബൈ: ഇന്ന് വോട്ടെടുപ്പ് നടക്കുന്ന മഹാരാഷ്ട്രയില്‍ എന്‍.ഡി.എ മുന്നണിക്ക് തലവേദന സൃഷ്ടിച്ച് സഖ്യകക്ഷിയായ ശിവസേനയുടെ വിമര്‍ശനം. പ്രതിപക്ഷം ഇല്ലെങ്കില്‍ പിന്നെ എന്തിനാണ് പ്രധാനമന്ത്രി നരേന്ദ്ര മോദിയും ബി.ജെ.പി അധ്യക്ഷന്‍ അമിത്ഷായും ഓടിനടന്ന് കൂടുതല്‍ റാലികളില്‍ പങ്കെടുക്കുന്നതെന്ന് ശിവസേന ചോദിച്ചു. ശിവസേനയുടെ മുതിര്‍ന്ന നേതാവും രാജ്യസഭ എം.പിയുമായ സഞ്ജയ് റാവത്ത് പാര്‍ട്ടി മുഖപത്രമായ സാമ്‌നയില്‍ എഴുതിയ ലേഖനത്തില്‍ ആണ് ബി.ജെ.പിയെ വിമര്‍ശിച്ചത്. പ്രതിപക്ഷ കക്ഷികളുടെ ശക്തി കുറഞ്ഞുവരികയാണെന്നും ബി.ജെ.പി സഖ്യത്തെ നേരിടാന്‍ ശേഷിയുള്ള കരുത്തരൊന്നും മഹാരാഷ്ട്രയില്‍ പ്രതിപക്ഷനിരയില്‍ ഇല്ലെന്നും അടുത്തിടെ മഹാരാഷ്ട്ര മുഖ്യമന്ത്രി ദേവേന്ദ്ര ഫദ്‌നാവിസ് പറഞ്ഞിരുന്നു.