മല്ലോര്‍ക്ക: ലാലിഗ സീസണില്‍ സമനിലയില്‍ നിന്ന് പതിയെ കരകയറുന്ന റയല്‍ മാഡ്രിഡിന് സീസണിലെ ആദ്യ തോല്‍വി. ദുര്‍ബലരായ മല്ലോര്‍ക്കയാണ് റയലിനെ ഗോളടിപ്പിക്കാതെ കീഴ്‌പ്പെടുത്തിയത്.
ഒരു ഗോളിനായിരുന്നു ജയം. അതേസമയം, എയ്ബറിനെ അവരുടെ തട്ടകത്തില്‍ എതിരില്ലാത്ത മൂന്നു ഗോളുകള്‍ക്ക് പരാജയപ്പെടുത്തി ബാഴ്‌സലോണ പട്ടികയില്‍ ഒന്നാം സ്ഥാനത്തേക്കുയര്‍ന്നു. ഒന്‍പത് കളികളില്‍നിന്ന് ആറ് ജയവും ഒരു സമനിലയുമടക്കം 19 പോയിന്റാണ് ബാഴ്‌സയ്ക്കുള്ളത്. ഒരു പോയിന്റ് പിന്നിലുള്ള റയലാണ് രണ്ടാമത്. ഒന്‍പത് കളികളില്‍നിന്നായി 18 പോയിന്റാണ് റയലിന്.
മല്ലോര്‍ക്കയുടെ തട്ടകത്തില്‍ അവരെ പരാജയപ്പെടുത്തി പട്ടികയില്‍ ഒന്നാം സ്ഥാനത്തേക്ക് കുതിക്കാനുള്ള അവസരമാണ് സിദാന്റെ പട തുലച്ചത്. ഏഴാം മിനുട്ടില്‍ ഐവറി കോസ്റ്റിന്റെ മുന്നേറ്റ താരം ലാഗോ ജൂനിയറാണ് റയലിന്റെ പ്രതീക്ഷയ്ക്ക് മങ്ങലേല്‍പ്പിച്ചത്. മികച്ചൊരു മുന്നേറ്റത്തിലൂടെയായിരുന്നു താരത്തിന്റെ ഗോള്‍നേട്ടം. പിന്നീട് ഗോളിനായി ദാഹിച്ച റയലിന് പക്ഷേ ഗോള്‍ നേടാന്‍ കഴിഞ്ഞില്ല. 74ാം മിനുട്ടില്‍ അല്‍വാരോ ഒഡ്രിയാസോളയുടെ ചുവപ്പു കാര്‍ഡ് കണ്ട് പുറത്തുപോകലും റയലിന് ആഘാതം സൃഷ്ടിച്ചു. രണ്ട് മഞ്ഞക്കാര്‍ഡ് കണ്ടായിരുന്നു താരത്തിന്റെ മടക്കം.
ബാഴ്‌സയിലെ സൂപ്പര്‍ താരങ്ങളായ ലയണല്‍ മെസ്സിയും ലൂയിസ് സുവാരസും അന്റോണിയോ ഗ്രീസ്മാനും ചേര്‍ന്നാണ് എയ്‌റിന്റെ സ്വന്തം കാണികള്‍ക്ക് മുന്നില്‍ ബാഴ്‌സയ്ക്ക് ഉഗ്രന്‍ വിജയം സമ്മാനിച്ചത്. ലോകോത്തര താരങ്ങളുടെ ഗോളടികള്‍ അവര്‍ ആസ്വദിക്കുകയും ചെയ്തു. മത്സരത്തിലെ 13ാം മിനുട്ടില്‍ അന്റോണിയോ ഗ്രീസ്മാനാണ് മുന്നിലെത്തിച്ചത്. തുടര്‍ന്ന് മെസ്സിയും (58), സുവാരസും (66) ചേര്‍ന്ന് ബാഴ്‌സയുടെ വിജയത്തില്‍ മാറ്റ്കൂട്ടി.