ജിദ്ദ: മദീനയില്‍ വാഹനങ്ങള്‍ കൂട്ടിയിടിച്ച് തീപിടിത്തമുണ്ടായതിനെ തുടര്‍ന്ന് കുടുംബത്തിലെ നാലുപേരടക്കം അഞ്ചുപേര്‍ വെന്തുമരിച്ചു. രണ്ടാമത്തെ വാഹനത്തിലെ ഡ്രൈവറാണ് മരിച്ച ആഞ്ചാമന്‍.

തേഡ് റിംഗ് റോഡ് പിന്നിട്ട് തബൂക്കിലേക്കുള്ള അല്‍സലാം റോഡില്‍ വെച്ചായിരുന്നു അപകടം. കണ്‍ട്രോള്‍ റൂമില്‍ വിവരം ലഭിച്ചയുടന്‍ മൂന്ന് രക്ഷാദൗത്യ സംഘങ്ങളെയും ഒരു വിദഗ്ധ മെഡിക്കല്‍ സംഘത്തെയും സംഭവ സ്ഥലത്തേക്ക് നിയോഗിച്ചതായി മദീന പ്രവിശ്യാ റെഡ്ക്രസന്റ് അതോറിറ്റി വക്താവ് ഖാലിദ് ബിന്‍ മുസാഇദ് അല്‍സഹ്‌ലി പറഞ്ഞു.

പക്ഷേ, ആദ്യ സംഘം സ്ഥലത്ത് എത്തിയപ്പോഴേക്കും അപകടത്തില്‍പെട്ട മുഴുവന്‍ പേരും മരിച്ചിരുന്നുവെന്നും അദ്ദേഹം പറഞ്ഞു. സിവില്‍ ഡിഫന്‍സിന്റെ സഹായത്തോടെ തീ അണച്ചതിന് ശേഷം മൃതദേഹങ്ങള്‍ സമീപത്തെ ആശുപത്രിയിലേക്ക് നീക്കിയതായും ഖാലിദ് അല്‍സഹ്‌ലി പറഞ്ഞു.