അമ്പലപ്പുഴ: സ്‌കൂള്‍ പരിസരം കഞ്ചാവ് മാഫിയയുടെ പിടിയിലായിട്ടും പൊലിസ് തിരിഞ്ഞു നോക്കുന്നില്ലെന്ന് പരാതി. കാക്കാഴം ഗവ. ഹയര്‍ സെക്കന്‍ഡറി സ്‌കൂള്‍ പരിസരമാണ് കഞ്ചാവ് മാഫിയയുടെ പിടിയിലായത്. ഇവിടെ എസ്.എന്‍.വി.ടി.ടി.ഐ സ്‌കൂളിലും ഹയര്‍ സെക്കന്‍ഡറി സ്‌കൂളിലുമായി ആയിരത്തിലധികം വിദ്യാര്‍ഥികളാണ് പഠിക്കുന്നത്. വിദ്യാര്‍ഥികളെ ലക്ഷ്യമിട്ടാണ് കഞ്ചാവ് വില്‍പ്പനക്കാര്‍ സജീവമായിരിക്കുന്നത്. ഇരുചക്രവാഹനങ്ങളില്‍ എത്തുന്ന വില്‍പ്പനക്കാര്‍ ചെറിയ പൊതികളിലായാണ് കഞ്ചാവ് വില്‍ക്കുന്നത്.
കാക്കാഴം റെയില്‍വെ മേല്‍പ്പാലത്തിന്റെ താഴെയാണ് കഞ്ചാവ് മാഫിയ താവളമാക്കിയിരിക്കുന്നത്. ഏതാനും മാസം മുന്‍പ് എക്‌സൈസ് ഇവിടെ നിന്ന് കഞ്ചാവുമായി യുവാവിനെ പിടികൂടിയിരുന്നു. എന്നാല്‍ ഇപ്പോള്‍ പൊലിസിന്റെയും എക്‌സൈസിന്റെയും പരിശോധന നിലച്ചതോടെ കഞ്ചാവ് വില്‍പ്പന വീണ്ടും സജീവമായിരിക്കുകയാണ്. ഇത് കണക്കിലെടുത്ത് പരിശോധന കര്‍ശനമാക്കാന്‍ പൊലിസ് തയ്യാറാകണമെന്നാണ് നാട്ടുകാരുടെ ആവശ്യം.