പെരിന്തല്‍മണ്ണ: സംസ്ഥാനത്തെ തെരഞ്ഞെടുത്ത നഗരസഭകള്‍ക്ക് ലോകബാങ്ക് നല്‍കുന്ന പ്രത്യേക ധനസഹായത്തിന്റെ സാധ്യതകള്‍ പഠിച്ച് നഗര മേഖലയിലുള്ള പ്രശ്‌നങ്ങള്‍ പരിഹരിക്കുന്നതിനായി പദ്ധതികള്‍ ആവിഷ്‌കരിക്കുക, സേവന ഗുണമേന്മ മെച്ചപ്പെടുത്തി അന്താരാഷ്ട്ര മാതൃകകള്‍ സൃഷ്ടിക്കുക എന്നീ ലക്ഷ്യത്തോടെ ലോകബാങ്ക് പ്രതിനിധി സംഘം പെരിന്തല്‍മണ്ണ നഗരസഭ സന്ദര്‍ശിച്ചു.
മുനിസിപ്പല്‍ എന്‍ജിനിയര്‍, എന്‍വയോണ്‍മെന്റ് സ്‌പെഷലിസ്റ്റ്, സോഷ്യല്‍ ഡെവലപ്‌മെന്റ് എക്‌സ്‌പേര്‍ട്ട്, പോളിസി മേക്കര്‍, ഡിസാസ്റ്റര്‍ മാനേജര്‍ എന്നിങ്ങനെ ചുമതലയുള്ള 11 അംഗ സംഘമാണ് നഗരസഭ സന്ദര്‍ശിച്ചത്.
അര്‍ബന്‍ സ്‌പെഷലിസ്റ്റ് ഹര്‍ഷ് ഗോയലിന്റെ നേതൃത്വത്തിലുള്ള സംഘത്തില്‍ നഹോഷിബുയാ (ഡിസാസ്റ്റര്‍ മാനേജ്‌മെന്റ്), കെ.എല്‍.ജി.എസ്.ഡി.പി (കേരള ലോക്കല്‍ ഗവണ്‍മെന്റ് സര്‍വിസ് ഡെലിവറി പ്രൊജക്ട്), ഡെപ്യൂട്ടി പ്രൊജക്ട് ഡയറക്ടര്‍ ഡോ. വി.പി സുകുമാരന്‍ എന്നിവരും ഉണ്ടായിരുന്നു. രാമനാട്ടുകര, കൊടുങ്ങല്ലൂര്‍, ആലപ്പുഴ, നോര്‍ത്ത് പറവൂര്‍ എന്നിവയാണ് അടുത്തതായി സംഘം സന്ദര്‍ശിക്കുന്നത്.