തളിപ്പറമ്പ്: ദേശീയപാതയിലെ കുറ്റിക്കോല്‍ പാലത്തിനു സമീപത്തുനിന്നു പരസ്യ മദ്യപാനത്തിന് പൊലിസ് പിടിയിലായ യുവാവ് എസ്.ഐയെ കൈയേറ്റം ചെയ്തു. ബുധനാഴ്ച നൈറ്റ് പട്രോളിങ്ങിനിടെയാണ് ഒരു സംഘം പരസ്യമായി മദ്യപിക്കുന്നത് പൊലിസിന്റെ ശ്രദ്ധയില്‍പെട്ടത്. ഒന്‍പതു പേരടങ്ങുന്ന സംഘം പൊലിസിനെ കണ്ട് ഓടിയെങ്കിലും നാലു പേര്‍ പിടിയിലായി. ഇവരെ പൊലിസ് വാഹനത്തില്‍ കയറ്റുന്നതിനിടെ മുണ്ടപ്രത്തെ കെ.കെ ഷാജി എന്ന യുവാവാണ് പൊലിസിനു നേരെ തട്ടിക്കയറുകയും വണ്ടിയില്‍ കയറാതെ ബലംപിടിച്ചു നില്‍ക്കുകയും ചെയ്തത്. ഇതോടെ പൊലിസ് ബലപ്രയോഗത്തിലൂടെ ഇയാളെ വണ്ടിയില്‍ കയറ്റി സ്‌റ്റേഷനിലെത്തിച്ചു. പരസ്യ മദ്യപാനത്തിന് കേസെടുത്ത് അറസ്റ്റ് മെമ്മോയില്‍ ഒപ്പിടാന്‍ ആവശ്യപ്പെട്ടപ്പോള്‍ എസ്.ഐയെ കൈയേറ്റം ചെയ്യാന്‍ ശ്രമിച്ചതോടെ പൊലിസിന്റെ ഔദ്യോഗിക കൃത്യനിര്‍വഹണത്തിന് തടസമുണ്ടാക്കിയതിന് ഇയാളെ കസ്റ്റഡിയില്‍ വച്ച് മറ്റ് മൂന്ന് പേരെയും ജാമ്യത്തില്‍ വിട്ടു. ഷാജിയെ കോടതിയില്‍ ഹാജരാക്കി. കുറ്റിക്കോല്‍ പാലത്തിനു സമീപത്ത് പരസ്യമായി മദ്യപിക്കുന്നവരുടെ ശല്യമുണ്ടെന്ന് പ്രദേശത്തെ സ്ത്രീകളുടെ പരാതിയുണ്ടായിരുന്നതായും സ്ഥിരമായി അവിടെ മദ്യപിക്കുന്നവര്‍ തന്നെയാണ് പിടിയിലായതെന്നും പൊലിസ് പറഞ്ഞു.