തിരുവനന്തപുരം: കനത്ത മഴയില്‍ എറണാകുളം നോര്‍ത്ത്, സൗത്ത് സ്റ്റേഷനുകളിലെ ട്രാക്കുകളില്‍ വെള്ളം കയറിയതിനെ തുടര്‍ന്ന് ട്രെയിന്‍ ഗതാഗതം താറുമാറായി.
വൈക്കത്തിനും പിറവത്തിനും ഇടയില്‍ പാളത്തിലേക്ക് മണ്ണിടിഞ്ഞതും പ്രശ്‌നം രൂക്ഷമാക്കി. വെള്ളക്കെട്ടിന് പിന്നാലെ സിഗ്നല്‍ സംവിധാനത്തിനും തകരാറുണ്ടായി. എറണാകുളം നോര്‍ത്ത് വഴി ഉച്ചയോടെ ഗതാഗതം പുനഃസ്ഥാപിച്ചു. ഇന്നലെ 14 ട്രെയിനുകള്‍ പൂര്‍ണമായും 23 എണ്ണം ഭാഗികമായും റദ്ദാക്കി. മൂന്ന് ട്രെയിനുകള്‍ വഴിതിരിച്ചുവിട്ടു. സര്‍വിസ് നടത്തിയവയെല്ലാം മണിക്കൂറുകള്‍ വൈകിയാണ് ഓടിയത്. ഇതിനേത്തുടര്‍ന്ന് യാത്രക്കാര്‍ ദുരിതത്തിലായി.
തിരുവനന്തപുരം, കണ്ണൂര്‍ ജനശതാബ്ദി എക്‌സ്പ്രസ്, എറണാകുളം ബംഗളൂരു ഇന്റര്‍സിറ്റി എക്‌സ്പ്രസ്, എറണാകുളം- ആലപ്പുഴ (56379), ആലപ്പുഴ- എറണാകുളം (56384), എറണാകുളം- കായംകുളം (ആലപ്പുഴ വഴി 56381), കായംകുളം-എറണാകുളം (ആലപ്പുഴ വഴി 56382), എറണാകുളം-കായംകുളം (കോട്ടയം വഴി 56387), കായംകുളം-എറണാകുളം (കോട്ടയം വഴി 56388), ഗുരുവായൂര്‍-തൃശൂര്‍ (56043), തൃശൂര്‍-ഗുരുവായൂര്‍ (56044), കൊല്ലം-എറണാകുളം (66308), എറണാകുളം-ആലപ്പുഴ (56303), ആലപ്പുഴ-കൊല്ലം (56301), ഗുരുവായൂര്‍-എറണാകുളം (56375) എന്നീ പാസഞ്ചര്‍ ട്രെയിനുകളുമാണ് പൂര്‍ണമായും റദ്ദാക്കിയത്.തിരുവനന്തപുരം-കോഴിക്കോട് ജനശതാബ്ദി ആലപ്പുഴയില്‍ യാത്ര അവസാനിപ്പിച്ചു. കോഴിക്കോട്-തിരുവനന്തപുരം ജനശതാബ്ദി ആലപ്പുഴയില്‍ നിന്നാണ് മടക്കയാത്ര അരംഭിച്ചത്. ചെന്നൈ എഗ്മോര്‍ ഗുരുവായൂര്‍ എക്‌സ്പ്രസ് എറണാകുളം ജങ്ഷനിലും സര്‍വിസ് നിര്‍ത്തി.
നാഗര്‍കോവില്‍ മംഗളുരൂ ഏറനാട് എക്‌സ്പ്രസ് തുറവൂരില്‍ യാത്ര അവസാനിപ്പിച്ചു. ഈ ട്രെയിന്‍ തുറവൂരില്‍ നിന്ന് നാഗര്‍കോവിലിലേക്കുള്ള ഏറനാട് എക്‌സ്പ്രസായി (16605) സര്‍വിസ് നടത്തി. കണ്ണൂര്‍ ആലപ്പുഴ എക്‌സിക്യുട്ടീവ് തൃശൂരില്‍ യാത്ര അവസാനിപ്പിച്ചു. മടക്കയാത്ര തൃശൂരില്‍ നിന്നാണ് ആരംഭിച്ചത്. പാലക്കാട്-എറണാകുളം മെമു തൃശൂരില്‍ യാത്ര അവസാനിപ്പിച്ചു. പുനലൂര്‍-പാലക്കാട് പാലരുവി എക്‌സ്പ്രസ് മുളന്തുരുത്തിയിലും തിരുവനന്തപുരം ഷൊര്‍ണൂര്‍ വേണാട് എക്‌സ്പ്രസ് പിറവം റോഡിലും ചെന്നൈ ആലപ്പുഴ സൂപ്പര്‍ ഫാസ്റ്റ് അങ്കമാലിയിലും യാത്ര അവസാനിപ്പിച്ചു. ആലപ്പുഴ-ചെന്നൈ സൂപ്പര്‍ ഫാസ്റ്റ് അങ്കമാലിയില്‍ നിന്നാണ് ഓട്ടം തുടങ്ങിയത്. മഡ്ഗാവ് എറണാകുളം പ്രതിവാര ട്രെയിന്‍ ചാലക്കുടിയിലും ചെന്നൈ എഗ്മോര്‍ ഗുരുവായൂര്‍ എക്‌സ്പ്രസ് എറണാകുളത്തും യാത്ര അവസാനിപ്പിച്ചു. എറണാകുളം-മഡ്ഗാവ് (10215) എക്‌സ്പ്രസ് ചാലക്കുടിയില്‍ നിന്നും ഗുരുവായൂര്‍ ചെന്നൈ എഗ്മോര്‍ എക്‌സ്പ്രസ് എറണാകുളത്ത് നിന്നുമാണ് യാത്ര പുനരാരംഭിച്ചത്. തിരുവനന്തപുരം ചണ്ഡീഗഢ് സമ്പര്‍ക്കക്രാന്തി എക്‌സ്പ്രസ്, തിരുവനന്തപുരം ലോക്മാന്യതിലക് നേത്രാവതി എക്‌സ്പ്രസ് എന്നിവ കോട്ടയം വഴി തിരിച്ചുവിട്ടു.