കൊച്ചി: ഐ.ഒ.സി പ്ലാന്റിനെതിരേ പുതുവൈപ്പ് നിവാസികള്‍ നടത്തുന്ന സമരത്തിന് പിന്തുണ പ്രഖ്യാപിച്ച് വിവിധ സംഘടനകള്‍ എറണാകുളം റേഞ്ച് ഐ.ജി ഓഫിസിന് മുന്നിലേക്ക് മാര്‍ച്ച് നടത്തി. മാര്‍ച്ച് ഹൈക്കോടതി ജങ്ഷനുമുന്നില്‍ പൊലിസ് തടഞ്ഞു. പുതുവൈപ്പ് സമരസമിതി നേതാവ് മാഗ്ലിന്‍ മാര്‍ച്ച് ഉദ്ഘാടനം ചെയ്തു.
സ്ത്രീകളെ സംരക്ഷിക്കുമെന്ന് പറയുന്ന പൊലിസ് സംവിധാനം തന്നെ അവര്‍ക്കെതിരേ അക്രമം അഴിച്ചുവിടുകയാണ്. എന്നാല്‍ പൊലിസ് അതിക്രമങ്ങള്‍കൊണ്ടൊന്നും സമരത്തില്‍ നിന്നും പിന്മാറില്ലെന്നും അവര്‍ വ്യക്തമാക്കി. ഡി.ജി.പി ടി.പി സെന്‍കുമാറിന്റെ പ്രസ്താവന അശ്ലീലം നിറഞ്ഞതാണന്ന് അധ്യക്ഷയായ കുസുമം ടീച്ചര്‍ പറഞ്ഞു.
ടി.യു.സി.ഐ, ആം ആദ്മി, എസ്.യു.സി.ഐ, വിവിധ പരിസ്ഥിതി സംഘടനകള്‍ എന്നിവരുടെ നേതൃത്വത്തിലാണ് മാര്‍ച്ച് നടത്തിയത്. സി ആര്‍ നീലകണ്ഠന്‍, പുരുഷന്‍ എലൂര്‍, ജോണ്‍ പെരുവന്താനം, കുരുവിള മാത്യൂസ് എന്നിവര്‍ സംസാരിച്ചു.