ലണ്ടന്‍: ചാംപ്യന്‍സ്‌ലീഗിന്റെ മൂന്നാം മത്സരങ്ങള്‍ക്കായി ഇന്ന് വിവിധ ടീമുകള്‍ കളത്തിലിറങ്ങുന്നു. റയല്‍ മാഡ്രിഡ്, യുവന്റസ്, മാഞ്ചസ്റ്റര്‍ സിറ്റി, ബയേണ്‍ മ്യൂണിക്, ടോട്ടനം, പി.എസ്.ജി എന്നീ ക്ലബുകള്‍ ഉള്‍പ്പെടുന്ന എട്ട് മത്സരങ്ങളാണ് ഇന്ന് നടക്കുന്നത്.
രാത്രി 10.25ന് ഗ്രൂപ്പ് സിയില്‍ ഷാക്തറും ഡൈനാമോ സഗ്രിബും തമ്മിലാണ് മത്സരം. ഗ്രൂപ്പില്‍ രണ്ടാം സ്ഥാനത്തുള്ള സഗ്രിബും മൂന്നാം സ്ഥാനത്തുള്ള ഷാക്തറും പ്രീ ക്വാര്‍ട്ടറിന് വേണ്ടി ഇന്ന് ജീവന്‍മരണ പോരാട്ടം നടത്തും. ഗ്രൂപ്പില്‍ മാഞ്ചസ്റ്റര്‍ സിറ്റി ഒഴികെ എല്ലാവരും ചെറു ടീമുകളാണ്. ആയതിനാല്‍ ആര്‍ക്ക് വേണമെങ്കിലും പ്രീക്വാര്‍ട്ടറില്‍ പ്രവേശിക്കാനാകും. മറ്റൊരു മത്സരത്തില്‍ ലാലിഗയിലെ കരുത്തരായ അത്‌ലറ്റികോ മാഡ്രിഡ് ബയര്‍ ലവര്‍കൂസനെ നേരിടും.
ഗ്രൂപ്പ് ഡിയില്‍ രണ്ടാം സ്ഥാനത്തുള്ള അത്‌ലറ്റികോക്ക് ബയറിനെ നിശ്പ്രയാസം പരാജയപ്പെടുത്താമെന്ന കണക്ക് കൂട്ടലിലാണ്. ആദ്യ രണ്ട് മത്സരത്തിലും പരാജയപ്പെട്ട ബയര്‍ പട്ടികയില്‍ അവസാന സ്ഥാനത്താണുള്ളത്. രാത്രി 12.30ന് നടക്കുന്ന മത്സരത്തില്‍ മാഞ്ചസ്റ്റര്‍ സിറ്റി അറ്റ്‌ലാന്റയെ നേരിടും. രണ്ട് മത്സരത്തിലും തോറ്റ അറ്റ്‌ലാന്റക്ക് ഇനി പ്രതീക്ഷകളില്ല. ഗ്രൂപ്പ് എയിലെ ശക്തമായ മത്സരമായ റയല്‍ മാഡ്രിഡ് ഗലത്സറെ പോരാട്ടം ഇന്ന് നടക്കും.
ഗ്രൂപ്പില്‍ അവസാന സ്ഥാനത്തുള്ള റയല്‍ മാഡ്രിഡിന് ഇനിയുള്ള മത്സരങ്ങള്‍ ജയിച്ചാല്‍ മാത്രമേ പ്രീ ക്വാര്‍ട്ടറിനെ കുറിച്ച് സ്വപ്നം കാണാന്‍ കഴിയൂ. ഒരു തോല്‍വിയും ഒരു സമനിലയുമുള്ള റയലിന് ഒരു പോയിന്റ് മാത്രമാണുള്ളത്. മറ്റൊരു മത്സരത്തില്‍ ജര്‍മന്‍ കരുത്തരായ ബയേണ്‍ മ്യൂണിക്കും ഒളിംപിയാകോസും തമ്മില്‍ ഏറ്റുമുട്ടും.
പട്ടികയില്‍ ഒന്നാം സ്ഥാനത്തുള്ള ബയേണ്‍ മ്യൂണിക്കിന് ഇന്ന് അനായാസം ജയം സ്വന്തമാക്കാം. പട്ടകയില്‍ അവസാന സ്ഥാനത്തുള്ള ഒളിംപിയാകോസ് കാര്യമായ വെല്ലുവിളിയൊന്നും ഉയര്‍ത്തില്ല. മറ്റൊരു മത്സരം ഗൂപ്പ് എയിലെ പി.എസ്.ജിയും ക്ലബ് ബ്രഗെയും തമ്മിലാണ്. ഗ്രൂപ്പില്‍ ഒന്നാം സ്ഥാനത്തുള്ള പി.എസ്.ജി ശക്തമായ നിലയിലാണ്. ആദ്യ മത്സരത്തില്‍ റയല്‍ മാഡ്രിഡിനെ എതിരില്ലാത്ത മൂന്ന് ഗോളിന് തകര്‍ത്തതിന്റെ ആത്മവിശ്വാസത്തിലാണ്. വിലക്ക് മാറിയ നെയ്മര്‍ ഇന്ന് കളിക്കുമെന്നാണ് റിപ്പോര്‍ട്ടുകള്‍. എംബാപ്പെ, കവാനി എന്നിവരുടെ കാര്യത്തില്‍ വ്യക്തത വന്നിട്ടില്ല. ഗ്രൂപ്പ് ബിയില്‍ ക്രവനയെ നേരിടുന്ന ടോട്ടനം ഇന്ന് ജയത്തില്‍ കുറഞ്ഞതൊന്നും ചിന്തിക്കുന്നില്ല. കാരണം രണ്ട് മത്സരത്തില്‍നിന്ന് ഒരു പോയിന്റുമായി ടോട്ടനം ഗ്രൂപ്പില്‍ മൂന്നാമതാണ്. പ്രീ ക്വാര്‍ട്ടര്‍ യോഗ്യത ഉറപ്പിക്കണമെങ്കില്‍ സ്പര്‍സിന് ഇനിയുള്ള മത്സരങ്ങള്‍ ജയിച്ചേ തീരു. മറ്റൊരു മത്സരത്തില്‍ ക്രിസ്റ്റ്യാനോ റൊണാള്‍ഡോയുടെ യുവന്റസ് ലോകോമോട്ടീവ് മോസ്‌കോയെ നേരിടും. ഗ്രൂപ്പില്‍ ഒന്നാം സ്ഥാനത്ത് തുടരുന്ന യുവന്റസിന് സ്ഥാനം നിലനിര്‍ത്തണമെങ്കില്‍ ജയം തുടരേണ്ടി വരും. രാത്രി 12.30നാണ് മത്സരം.