ജിദ്ദ: മദീനക്ക് സമീപം ഹിജ്റ റോഡിലുണ്ടായ അപകടത്തില്‍ ഏഴ് ഇന്ത്യക്കാര്‍ മരിച്ചതായി ജിദ്ദ ഇന്ത്യന്‍ കോണ്‍സുലേറ്റ് സ്ഥിരീകരിച്ചു. ബിഹാര്‍ മുസഫര്‍പുര്‍ സ്വദേശി അശ്റഫ് ആലം, യു.പി സ്വദേശികളായ ഫിറോസ് അലി, അഫ്താബ് അലി, നൗഷാദ് അലി, സീശാന്‍ ഖാന്‍, ബിലാല്‍, പശ്ചിമ ബംഗാള്‍ സ്വദേശി മുഖ്താര്‍ അലി എന്നിവരാണ് മരിച്ചത്.

അതേ സമയം അപകടത്തില്‍ പരിക്കേറ്റ മഹാരാഷ്ട്ര പൂനെ സ്വദേശികളായ മതീന്‍ ഗുലാം, ഭാര്യ സീബ നിസാം എന്നിവര്‍ മദീന കിംഗ് ഫഹദ് ആശുപത്രിയില്‍ ചികിത്സയിലാണെന്നും കോണ്‍സുലേറ്റ് അറിയിച്ചു.റിയാദില്‍ നിന്നുള്ള ഉംറ തീര്‍ത്ഥാടകര്‍ സഞ്ചരിച്ച ബസ് എസ്‌കവേറ്ററുമായി കൂട്ടിയിടിച്ചുണ്ടായ അപകടത്തില്‍ 36 പേരാണ് മരിച്ചത് അപകടത്തില്‍ 35 പേര് സംഭവസ്ഥലതവെച്ചും ഒരാള്‍ ആശുപത്രിയില്‍ വെച്ചുമാണ് മരിച്ചത്. ആകെ 39 പേരായിരുന്നു ബസ്സില്‍ യാത്ര ചെയ്തിരുന്നത്. മൂന്നു പേരാണ് സംഭവത്തില്‍ രക്ഷപ്പെട്ടത്. ഇതില്‍ മഹാരാഷ്ട്ര സ്വദേശികളായ ദമ്പതികളാണ് രണ്ടു പേര്‍.
ആശുപത്രിയില്‍ കഴിയുന്ന ദമ്പതികള്‍ക്ക് സാധ്യമായ എല്ലാ സഹായവും ചെയ്യുന്നുണ്ടെന്നും കോണ്‍സുലേറ്റ് വ്യക്തമാക്കി.

അതേസമയം, അപകടത്തില്‍ മരിച്ചവരുടെ വിശദ വിവരങ്ങള്‍ ഇതുവരെ സഊദി അധികൃതര്‍ പുറത്തു വിട്ടിട്ടില്ല. മൃതദേഹങ്ങള്‍ കത്തിക്കരിഞ്ഞ നിലയിലായതിനാല്‍ കൂടുതല്‍ പരിശോധന നടത്തിയ ശേഷമേ വിശദ വിവരങ്ങള്‍ ലഭ്യമാവുകയുള്ളൂ. റിയാദിലെ ബംഗ്ലാദേശ് ഗ്രൂപ്പാണ് ഉംറ സര്‍വീസ് സംഘടിപ്പിച്ചത്. തീര്‍ഥാടകരെക്കുറിച്ച രേഖകളൊന്നും ടൂര്‍ ഓപറേറ്ററുടെ പക്കലില്ല എന്നാണ് വിവരം. അതുകൊണ്ടുതന്നെ മരിച്ചവരെ തിരിച്ചറയല്‍ നടപടി വളരെ സങ്കീര്‍ണമാണ്. കുടുംബസമ്മേതം ഉംറ നിര്‍വഹിക്കാന്‍ വന്നവരടക്കം ഇക്കൂട്ടത്തിലുണ്ട്. ബസ് പൂര്‍ണമായും കത്തിപ്പോയതിനാല്‍ യാത്രക്കാരുടെ രേഖകളും ലഭ്യമാവാന്‍ പ്രയാസമാണ്.