പെരുവള്ളൂര്‍: പൊതുസ്ഥലങ്ങളില്‍ മാലിന്യം തള്ളുന്നത് പതിവായിട്ടും പ്രതികളെ കണ്ടെത്താനാവാതെ അധികൃതര്‍ കൈമലര്‍ത്തുന്നു.
പെരുവള്ളൂരിലെ തോട്ടശ്ശേരിയറ-സിദ്ധീഖാബാദ് റോഡില്‍ മൂഞ്ഞമ്പുറം അരുവില്‍ ടാങ്കര്‍ ലോറിയില്‍ കൊണ്ടുവന്ന കടുത്ത രോഗഭീഷണി ഉയര്‍ത്തുന്ന മാലിന്യങ്ങളാണ് കഴിഞ്ഞ ദിവസം ഇരുട്ടിന്റെ മറവില്‍ തള്ളിയത്. മാലിന്യം താഴേക്കൊഴുകി അരീക്കാട്ട് അരുവില്‍ തോട്ടില്‍ എത്തിയത് കാരണം കുളിക്കാന്‍ ഉള്‍പ്പെടെ തോട്ടിലെ വെള്ളം ഉപയോഗിച്ചവര്‍ക്ക് ദേഹാസ്വാസ്ഥ്യവും ചൊറിച്ചിലും ഉണ്ടായതായി പ്രദേശവാസികള്‍ പറഞ്ഞു.
പൊതുസ്ഥലങ്ങളില്‍ ദിനേനയെന്നോണം മാലിന്യം തള്ളുന്നത് പതിവു കാഴ്ചയായിട്ടും മാലിന്യം കൊണ്ടു വരുന്നതിന്റെ ഉറവിടവും കരാറടിസ്ഥാനത്തില്‍ സ്ഥാപനങ്ങളില്‍ നിന്നും ടാങ്കറുകളില്‍ കയറ്റി കൊണ്ടുവന്ന് പൊതുസ്ഥലങ്ങളില്‍ തള്ളുന്ന സാമൂഹ്യ ദ്രോഹികളെയും പിടികൂടാന്‍ കഴിയാത്തത് അധികൃതരുടെ തികഞ്ഞ അനാസ്ഥയാണെന്നാണ് നാട്ടുകാരുടെ ആരോപണം.
ആശുപത്രികള്‍, അറവു ശാലകള്‍, ഹോട്ടലുകള്‍ ഉള്‍പ്പെടെയുള്ള സ്ഥാപനങ്ങളില്‍ ആവശ്യത്തിന് മാലിന്യം സംസ്‌കരണ സംവിധാനങ്ങളുണ്ടോയെന്നും നിലവില്‍ സംവിധാനങ്ങളില്ലാത്ത സ്ഥാപനങ്ങളിലെ മാലിന്യങ്ങള്‍ എവിടെയാണ് തള്ളുന്നതെന്ന് പരിശോധിക്കാനും ബന്ധപ്പെട്ട അധികൃതര്‍ തയാറാകണം. മാലിന്യ സംസ്‌കരണ സംവിധാനമൊരുക്കാത്ത സ്ഥാപനങ്ങളിലെ മാലിന്യങ്ങള്‍ കരാറടിസ്ഥാനത്തില്‍ കൊണ്ട് പോകുന്ന വാഹനങ്ങളില്‍ ചിലതാണ് പൊതു സ്ഥലങ്ങളില്‍ പതിവായി മാലിന്യം തള്ളുന്നതെന്നാണ് നാട്ടുകാരില്‍ നിന്നും ലഭിക്കുന്ന വിവരം.
ഇത്തരം വാഹനങ്ങള്‍ പരിശോധിക്കാനും അധികൃതര്‍ തയാറാകണമെന്നാണ് നാട്ടുകാര്‍ ആവശ്യപ്പെടുന്നത്.