കണ്ണൂര്‍: സംസ്ഥാന പൊലിസിലെ അധിക ചെലവു കുറയ്ക്കാന്‍ നടപടി വേണമെന്ന് ഹെഡ്ക്വാര്‍ട്ടേഴ്‌സ് എ.ഡി.ജി.പി ടോമിന്‍ ജെ. തച്ചങ്കരി. പൊലിസ് അസോസിയേഷന്‍ ജില്ലാ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ഉന്നത ഉദ്യോഗസ്ഥര്‍ക്ക് രണ്ട് പേഴ്‌സനല്‍ സെക്യൂരിറ്റി ഓഫിസര്‍മാരാണ് ഉള്ളത്.
ഒരു ഉദ്യോഗസ്ഥന് ഒരുമാസം ഒരുലക്ഷം രൂപയാണ് ഇതിനായി ചെലവ്. സര്‍ക്കാരിന്റെ പണമാണ് ഇതിനായി ഉപയോഗിക്കുന്നതെന്നും തച്ചങ്കരി വ്യക്തമാക്കി.
സെക്യൂരിറ്റി ഓഫിസറായാല്‍ സ്ഥിരം ജോലി തന്നെയാണ് എടുക്കേണ്ടിവരിക. 24-25 വര്‍ഷം വരെ പി.എസ്.ഒ ആയി ജോലി ചെയ്യുന്നവരെ തനിക്കറിയാം. ജനപ്രതിനിധികള്‍ക്കും മേലുദ്യോഗസ്ഥര്‍ക്കും ദാസ്യപ്പണി ചെയ്യാനുള്ളവരായി പൊലിസിനെ ഉപയോഗപ്പെടുത്തുകയാണ്.
സ്വന്തം മണ്ഡലത്തില്‍ പോകുന്നതിനു പോലും ജനപ്രതിനിധികള്‍ക്കു സുരക്ഷാ ഉദ്യോഗസ്ഥര്‍ വേണം. എന്നാല്‍, ഇത്തരം പി.എസ്.ഒകള്‍ ആരെയെങ്കിലും സന്നിഗ്ധ ഘട്ടത്തില്‍ രക്ഷപ്പെടുത്തിയതായി കേട്ടിട്ടില്ല. പൊലിസ് സേനയെ കൃത്യമായ രീതിയില്‍ ഉപയോഗിക്കുന്നില്ല. ഉയര്‍ന്ന യോഗ്യതയുള്ള ആളുകളാണ് സേനയില്‍ താഴ്ന്ന റാങ്കില്‍ ചേരുന്നത്. ഇവരെ വേണ്ട രീതിയില്‍ ഉപയോഗപ്പെടുത്തണം.
പുതുവൈപ്പിലെ തെറ്റായ ദൃശ്യമാണു ചാനലുകള്‍ പുറത്തുവിട്ടത്. രണ്ടുദിവസത്തിനു മുന്‍പുള്ള സംഭവം പുതിയ പൊലിസ് നടപടിയാണെന്നു കാണിച്ചാണു പ്രസിദ്ധീകരിച്ചത്. ചില മാധ്യമങ്ങള്‍ പൊലിസുകാരെ അപകീര്‍ത്തിപ്പെടുത്താനാണു ശ്രമിക്കുന്നതെന്നും തച്ചങ്കരി വ്യക്തമാക്കി.