കഠിനംകുളം: സ്‌കൂളുകളും കോളജുകളും കേന്ദ്രീകരിച്ച് കഞ്ചാവ് വില്‍പന നടത്തുന്ന സംഘത്തിലെ പ്രധാന പ്രതി പൊലിസ് പിടിയില്‍.അണ്ടൂര്‍ക്കോണം കൊയ്ത്തുര്‍ക്കോണം ഖബറഡി പള്ളിക്ക് സമീപം എ.എ.മന്‍സിലില്‍ നൗഷാദ് (28) ആണ് പോത്തന്‍കോട് പൊലിസിന്റെ
പിടിയിലായത്. അയിരൂപ്പാറ, കന്യാകുളങ്ങര, മുരുക്കുംപുഴ, വാവറയബലം, അണ്ടൂര്‍ക്കോണം പ്രദേശത്തെ വിദ്യാഭ്യാസ സ്ഥാപനങ്ങള്‍ കേന്ദ്രീകരിച്ചാണ് ഇയാള്‍ കഞ്ചാവ് വില്‍പന നടത്തിയിരുന്നതെന്ന്  പൊലിസ് പറഞ്ഞു.
ഇയാളില്‍ നിന്നും വില്പനക്കായി കരുതിയിരുന്ന കഞ്ചാവും പിടിച്ചെടുത്തിട്ടുണ്ട്. അടുത്തിടെ പോത്തന്‍കോട് സി.ഐയുടെ പരിതിയില്‍പ്പെട്ട വട്ടപ്പാറ, മംഗലപുരം, പോത്തന്‍കോട് സ്‌റ്റേഷനുകളില്‍ കഞ്ചാവുമായി ബന്ധപ്പെട്ട 20 കേസുകള്‍ രജിസ്റ്റര്‍ ചെയ്തിരുന്നു.
ഇതിന്റെ പശ്ചാത്തലത്തില്‍ റൂറല്‍ എസ്.പി ഷെഫിന്‍ അഹ് മദ്,ആറ്റിങ്ങള്‍ ഡിവൈ.എസ്.പി അജിത് കുമാര്‍ എന്നിവരുടെ നിര്‍ദേശത്തെ തുടര്‍ന്ന്  പ്രത്യേക സ്‌ക്വാഡ് രൂപീകരിച്ച്   അന്വേഷണം വ്യാപിപ്പിച്ചിരുന്നു.
പോത്തന്‍കോട് സി ഐ എസ്.ഷാജി, എസ്.ഐ. പ്രവീന്‍ എ.എസ്.ഐ അരുണ്‍, പൊലിസുകാരായ  രാജേഷ്, സുധീര്‍, ശ്രീജിത്ത് എന്നിവരടങ്ങിയ സംഘമാണ്  പ്രതിയെ പിടികൂടിയത്.