ബദിയഡുക്ക(കാസര്‍കോട്): ഒരു വര്‍ഷം മുന്‍പ് കാണാതായ യുവാവിന്റെ തലയോട്ടി വനത്തില്‍ കണ്ടെത്തി. ദേലംപാടി നൂജിബെട്ടുവിലെ ശേഷപ്പയുടെ മകന്‍ ശശിധര(35)യുടെ തലയോട്ടിയാണ് കണ്ടെത്തിയത്. 2018 മെയ് 16നാണ് ശശിധരയെ കാണാതായത്. ഇതേ തുടര്‍ന്ന് ബന്ധുക്കള്‍ നല്‍കിയ പരാതിയില്‍ ആദൂര്‍ പൊലിസ് കേസെടുത്ത് അന്വേഷണം നടത്തിയെങ്കിലും യുവാവിനെക്കുറിച്ച് വിവരമൊന്നും ലഭിച്ചിരുന്നില്ല.
കഴിഞ്ഞ മെയ് മാസത്തില്‍ ദേലംപാടി പൊക്ലമൂലയിലെ വനമേഖലയില്‍ മനുഷ്യന്റെ തുടയെല്ലും ദ്രവിച്ച ഷര്‍ട്ടും കണ്ടെത്തിയതോടെ മരിച്ചത് ശശിധരയാണെന്ന് ബന്ധുക്കള്‍ തിരിച്ചറിഞ്ഞിരുന്നു. തുടയെല്ല് ഫൊറന്‍സിക് പരിശോധനക്കായി കൊണ്ടുപോവുകയും ചെയ്തിരുന്നു. മറ്റ് അവശിഷ്ടങ്ങള്‍ കണ്ടെത്തുന്നതിനായി ബന്ധുക്കള്‍ തിരച്ചില്‍ നടത്തിയിരുന്നു. ഇതിനിടെയാണ് കഴിഞ്ഞ ദിവസം വൈകുന്നേരം ശശിധരയുടെ ബന്ധുവായ ഒരാള്‍ തുടയെല്ല് കണ്ട സ്ഥലത്ത് നിന്ന് നൂറ് മീറ്റര്‍ മാറി തലയോട്ടി കണ്ടെത്തിയത്. ഇതിന് സമീപം ദ്രവിച്ച കാവി നിറത്തിലുള്ള മുണ്ടും ഉണ്ടായിരുന്നു. ശശിധരയെ കാണാതാകുമ്പോള്‍ ഈ മുണ്ടാണ് ധരിച്ചതെന്ന് ബന്ധുക്കള്‍ പറഞ്ഞു. ഇതോടെ തലയോട്ടിയും ശശിധരയുടെതാണെന്ന് ബന്ധുക്കള്‍ സ്ഥിരീകരിച്ചിരുന്നു. ആദൂര്‍ പൊലിസും പരപ്പവനം വകുപ്പ് അധികൃതരും തലയോട്ടി കണ്ടെത്തിയ സ്ഥലത്ത് വിശദമായ പരിശോധന നടത്തി. വിദഗ്ധ പരിശോധനക്കായി തലയോട്ടി പരിയാരം മെഡിക്കല്‍ കോളജിലെ ഫൊറന്‍സിക് ലാബിലേക്ക് കൊണ്ടുപോയി.