ന്യൂഡല്‍ഹി: കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിക്ക് മോദി ഫോബിയ ആണെന്ന് അമിത് ഷാ. രാഹുല്‍ ഏത് സമയവും മോദി മന്ത്രങ്ങള്‍ ഉരുവിട്ടു കൊണ്ടിരിക്കുകയാണെന്നും അദ്ദേഹം പരിഹസിച്ചു. മധ്യപ്രദേശിലെ ബര്‍വാനിയില്‍ തെരഞ്ഞെടുപ്പ് റാലിയില്‍ സംസാരിക്കുകയായിരുന്നു അദ്ദേഹം.

കോണ്‍ഗ്രസ് അധ്യക്ഷന്‍ ബി.ജെ.പി റാലിയെ ആണോ അഭിമുഖീകരിക്കുന്നതെന്ന് തോന്നിപ്പോവും അദ്ദേഹത്തിന്റെ പ്രസംഗം കേട്ടാല്‍. അദ്ദേഹത്തിന്റെ പാര്‍ട്ടിയിലെ സഹപ്രവര്‍ത്തകരേക്കാളും നേതാക്കളേക്കാളും മോദിയുടെ പേരാണ് രാഹുല്‍ ഉച്ചരിക്കുന്നത്- അമിത് ഷാ ചൂണ്ടിക്കാട്ടി.

പിന്നാക്കക്കാര്‍ക്കു വേണ്ടി നല്ല കാര്യങ്ങള്‍ ചെയ്യുമെന്നാണ് രാഹുല്‍ പറയുന്നത്. എന്നാല്‍ സര്‍ക്കാര്‍ പിന്നാക്കക്കാര്‍ക്കു വേണ്ടിയുള്ളതാണെന്നാണ് പ്രധാനമന്ത്രിയായ ശേഷമുള്ള ആദ്യത്തെ പ്രസംഗത്തില്‍ മോദി പറഞ്ഞത്. പാവപ്പെട്ടവര്‍ക്കായി മോദി സൗജന്യ ഗ്യാസ് കണക്ഷന്‍ നല്‍കിയതടക്കം നിരവധി കാര്യങ്ങള്‍ മോദി ചെയ്തിട്ടുണ്ടെന്നും അദ്ദേഹം കൂട്ടിച്ചേര്‍ത്തു.