ന്യൂഡല്‍ഹി: ഹരിയാന, മഹാരാഷ്ട്ര നിയമസഭാ തെരഞ്ഞെടുപ്പ് ഫലവും ഇന്നറിയാം. രാവിലെ എട്ടുമണിയോടെയാണ് വോട്ടെണ്ണല്‍ ആരംഭിക്കുക. ഒരു മണിക്കൂറില്‍ ആദ്യഫലം അറിഞ്ഞു തുടങ്ങും. പൂര്‍ണ ഫലമറിയാന്‍ ഉച്ച കഴിയും. മഹാരാഷ്ട്രയിലെ 288 സീറ്റുകളിലേക്കും ഹരിയാനയിലെ 90 സീറ്റുകളിലേയ്ക്കുമാണ് ഈ മാസം 21ന് തെരഞ്ഞെടുപ്പ് നടന്നത്.

വോട്ടെടുപ്പിന് പിന്നാലെ പുറത്തുവിട്ട എക്‌സിറ്റ് പോള്‍ ഫലങ്ങളെല്ലാം രണ്ടു സംസ്ഥാനങ്ങളിലും ബി.ജെ.പിയുടെ നേതൃത്വത്തിലുള്ള സഖ്യം വീണ്ടും അധികാരത്തിലെത്തുമെന്നാണ് പ്രവചിച്ചിരിക്കുന്നത്. കോണ്‍ഗ്രസ്, ബി.ജെ.പി, ഇന്ത്യന്‍ നാഷനല്‍ ലോക്ദള്‍ (ഐ.എന്‍.എല്‍.ഡി), ജന്‍നായക് ജനതാ പാര്‍ട്ടി (ജെ.ജെ.പി) എന്നിങ്ങനെ നാലു പ്രധാന പാര്‍ട്ടികളാണ് ഹരിയാനയില്‍ മത്സരത്തിലുള്ളത്. ശിരോമണി അകാലിദള്‍ മൂന്ന് സീറ്റുകളില്‍ മത്സരിക്കുന്നുണ്ട്.

മഹാരാഷ്ട്രയില്‍ കോണ്‍ഗ്രസ് എന്‍.സി.പി സഖ്യവും ബി.ജെ.പി ശിവസേനാ സഖ്യവും തമ്മിലാണ് പ്രധാന മത്സരം. ഇരു സംസ്ഥാനങ്ങളിലും ഇത്തവണ പോളിങ് ശതമാനം കുറവായിരുന്നു. മഹാരാഷ്ട്രയില്‍ 60.05 ശതമാനവും ഹരിയാനയില്‍ 65 ശതമാവുമാണ് പോളിങ് രേഖപ്പെടുത്തിയത്.