ചെന്നൈ: ഐ ലീഗില്‍ ചെന്നൈ സിറ്റിയുടെ വിജയക്കുതിപ്പ് തുടരുന്നു. ഇന്നലെ നടന്ന മത്സരത്തില്‍ 2-1 എന്ന സ്‌കോറിനാണ് ചെന്നൈ സിറ്റി ഐസ്വാള്‍ എഫ്.സിയെ പരാജയപ്പെടുത്തിയത്. ജയത്തോടെ 13 പോയിന്റുമായി ചെന്നൈ പട്ടികയില്‍ ഒന്നാം സ്ഥാനത്ത് തുടരുന്നു. അതേസമയം, മൂന്നാം മത്സരത്തിലും തോല്‍വി പിണഞ്ഞ ഐസ്വാള്‍ രണ്ട് പോയിന്റുമായി പട്ടികയില്‍ അവസാന സ്ഥാനത്ത് നില്‍ക്കുന്നു.
ചെന്നൈക്കായി 49-ാം മിനുട്ടില്‍ സാന്‍ട്രോ റോഡ്രിഗസാണ് ആദ്യ ഗോള്‍ നേടിയത്. 72-ാം മിനുട്ടില്‍ അന്‍സുമാന ക്രോമയിലൂടെ ഐസ്വാള്‍ ഗോള്‍മടക്കി സമനില പിടിച്ചു. എന്നാല്‍ 77-ാം മിനുട്ടില്‍ റോഡ്രിഗസ് വീണ്ടും ഗോള്‍നേടി ചെന്നൈയെ മുന്നിലെത്തിക്കുകയായിരുന്നു.
സീസണില്‍ മികച്ച ഫോമിലുള്ള ചെന്നൈ കഴിഞ്ഞ നാല് മത്സരത്തിലും ജയം സ്വന്തമാക്കിയിട്ടുണ്ട്. ഗോകുലത്തിനെതിരേയുള്ള മത്സത്തില്‍ മാത്രമാണ് സമനില വഴങ്ങേണ്ടി വന്നത്. മികച്ച ഫോമിലുള്ള ചെന്നൈ താരം പെഡ്രോ മാന്‍സിയാണ് നാലു ഗോളുമായി ഗോള്‍വേട്ടക്കാരുടെ പട്ടികയില്‍ ഒന്നാം സ്ഥാനത്ത് നില്‍ക്കുന്നത്. രണ്ടാം സ്ഥാനത്തുള്ള ഈസ്റ്റ്ബംഗാള്‍ താരം എന്റികെക്കും മൂന്നാം സ്ഥാനത്തുള്ള ചെന്നൈ താരം റോഡ്രിഗസിനും മൂന്ന് ഗോള്‍വീതമാണുള്ളത്. ഞായറാഴ്ച നടക്കുന്ന മത്സരത്തില്‍ മിനര്‍വ പഞ്ചാബ് ഗോകുലത്തെ നേരിടും.
ഗോകുലത്തിന്റെ ഹോം ഗ്രൗണ്ടായ കോഴിക്കോട് കോര്‍പറേഷന്‍ സ്റ്റേഡിയത്തില്‍ രാത്രി 7.30നാണ് മത്സരം. നാലു മത്സരങ്ങളില്‍ നിന്ന് അഞ്ചു പോയിന്റുമായി അഞ്ചാംസ്ഥാനത്താണ് ഗോകുലമുള്ളത്. ഏഴാം സ്ഥാനത്തുള്ള മിനര്‍വക്ക് മൂന്ന് കളികളില്‍ നിന്ന് നാലുപോയിന്റാണുള്ളത്.