ആലപ്പുഴ: ഭരണഘടനയുടെ അടിസ്ഥാനമൂല്യങ്ങളെക്കുറിച്ചും രാജ്യത്തെ നിയമങ്ങളെകുറിച്ചും സമൂഹത്തിലെ മുഴുവന്‍ പൗരന്‍മാര്‍ക്കും അവബോധമുണ്ടാക്കുക എന്ന ലക്ഷ്യത്തോടെ ആലപ്പുഴ ജില്ല നിയമസേവന അതോറിറ്റി തയ്യാറാക്കിയ നിയമസാക്ഷരത പദ്ധതി  തെളിമയുടെ ജില്ലാതല ഉദ്ഘാടനം  ഇന്ന് നടക്കും. രാവിലെ 10.30ന് ആലപ്പുഴ ഗവണ്‍മെന്റ് ഗേള്‍സ് ഹൈസ്‌കൂള്‍ ഓഡിറ്റോറിയത്തില്‍ പൊതുമരാമത്ത് വകുപ്പു മന്ത്രി ജി. സുധാകരന്‍ ഉദ്ഘാടനം  ചെയ്യും.
മന്ത്രി ഡോ. ടി.എം.  തോമസ് ഐസക് നിയമസാക്ഷരത മിഷന്‍ ഉദ്ഘാടനം ചെയ്യും. കെ.സി. വേണുഗോപാല്‍ എം.പി. ലോഗോ പ്രകാശനവും ആലപ്പുഴ നഗരസഭ ചെയര്‍മാന്‍ തോമസ് ജോസഫ് കൈപ്പുസ്തക പ്രകാശനവും നടത്തും. ജില്ല ജഡ്ജി കെ.എം. ബാലചന്ദ്രന്‍ അധ്യക്ഷത വഹിക്കും. കലക്ടര്‍ വീണ എന്‍. മാധവന്‍, ജില്ലാ പൊലിസ് മേധാവി വി.എം. മുഹമ്മദ് റഫീഖ്, ഹൈക്കോടതി ജഡ്ജ് അബ്ദുള്‍ റഹീം, നിയമസേവന അതോറിട്ടി സെക്രട്ടറിയായ സബ് ജഡ്ജ് വി.ഉദയകുമാര്‍,  ഗവണ്‍മെന്റ് പ്ലീഡര്‍ സി.വി. ലുമുംബ, ആലപ്പുഴ ബാര്‍ അസോസിയേഷന്‍ പ്രസിഡന്റ്  റ്റി.ജി. സനല്‍കുമാര്‍, തെളിമ കോഓര്‍ഡിനേറ്റര്‍ എ.എ. റസാഖ്, സെക്രട്ടറി അനീഷ്‌കുമാര്‍  എന്നിവര്‍ പങ്കെടുക്കും.
പദ്ധതിയുടെ ഭാഗമായി ജില്ലയിലെ മുഴുവന്‍ ജനങ്ങള്‍ക്കും ഒന്നിച്ച് നിയമസാക്ഷരത ക്ലാസുകള്‍ തുടങ്ങുക എന്ന ലക്ഷ്യത്തോടുകൂടി  27ന്  ജില്ലയിലെ 72 ഗ്രാമപഞ്ചായത്തുകളിലും ആറു മുന്‍സിപ്പാലിറ്റികളിലും സ്‌കൂള്‍ കോളജ് തലങ്ങളില്‍ ക്ലാസുകള്‍ സംഘടിപ്പിക്കും.