തിരുവനന്തപുരം: യുവാവിനെ വെട്ടിപ്പരിക്കേല്‍പ്പിച്ച കേസില്‍ നിരവധി ക്രിമിനല്‍ കേസുകളിലെ പ്രതിയും ആറ് തവണ ഗുണ്ടാ ആക്ടില്‍ ജയില്‍ ശിക്ഷ അനുഭവിച്ചയാളുമായ പ്രതിയും കൂട്ടാളിയും പിടിയില്‍.
 ഉണ്ണി എന്ന ശ്രിജിത്തും (27)  സഹായി ആയ രാജേഷും (25)ആണ് പിടിയിലായത്. വ്യക്തിവൈരാഗ്യത്തെ തുടര്‍ന്ന് പുന്നയ്ക്ക് മുകള്‍ ആലപ്പുറത്തുള്ള അഭിലാഷിനെ വിജയമോഹിനി മില്ലിന് സമീപത്ത് ക്രിക്കറ്റ് സ്റ്റമ്പ് കൊണ്ട് അടിച്ച് വീഴ്ത്തിയ ശേഷം വെട്ടുകത്തി കൊണ്ട് വെട്ടിയ കേസിലാണ് ഇവരെ പൂജപ്പുര പൊലിസ് അറസ്റ്റു ചെയ്തത്.
കേരളത്തില്‍ ഏറ്റവും കുടുതല്‍ തവണ ഗുണ്ടാ ആക്ടില്‍ ഉള്‍പ്പെട്ട ശ്രീജിത്ത് ജയിലില്‍ കഴിയുന്ന സമയത്ത് വാദികളെ സ്വാധീനിച്ച് കേസ് രാജിയാക്കി തടങ്കല്‍ കാലാവധി പൂര്‍ത്തിയാക്കുന്നതിന് മുമ്പ് ജയില്‍ മോചിതനാകുന്നതാണ് പതിവ് രീതി. എന്നാല്‍ ജയില്‍ മോചിതനായ ഉടന്‍ തന്നെ വീണ്ടും കുറ്റകൃത്യങ്ങളില്‍ ഏറ്റപ്പെടുകയും ചെയ്യും.
 പിടിയിലായാല്‍ പൊലിസിനെ അക്രമിക്കുന്നതും ശരീരത്തില്‍ സ്വയം മുറിവുകള്‍ ഉണ്ടാക്കുന്നതും ഇയാളുടെ വിനോദമാണ്. ഈ അടുത്ത സമയത്ത് ജയില്‍ മോചിതനായ ശ്രീജിത്ത് തന്റെ സുഹൃത്തായ രാജേഷുമായി ചേര്‍ന്ന് ഗുണ്ടായിസവും കഞ്ചാവ് കച്ചവടവും വിപുലീകരിക്കുന്നതിന് തയ്യാര്‍ എടുക്കുന്നതിനിടയിലാണ് അഭിലാഷിനെ വെട്ടിപ്പരിക്കേല്‍പ്പിച്ചത്.
കൊലപാതകശ്രമം, കൂലിത്തല്ല്,ഗുണ്ടായിസം മുതലായ 20 ഓളം കേസുകള്‍ പൂജപ്പുര പോലിസ് സ്റ്റേഷനില്‍ മാത്രം ശ്രീജിത്തിന് എതിരെ ഉണ്ട്.
സംഭവത്തിന് ശേഷം ഒളിവില്‍ പോയ ശ്രീജിത്തിനെയും രാജേഷിനെയും ഒളിത്താവളത്തില്‍വെച്ചാണ് അറസ്റ്റ് ചെയ്തത്. വിജയമോഹിനി മില്ലിനു സമീപത്ത് ഒരു യുവാവിനെ കരിങ്കല്ല് കൊണ്ട് തലക്കടിച്ച് കൊലപ്പെടുത്താന്‍ ശ്രമിച്ചശേഷം ഇയാളുടെ കൈവശമുണ്ടായിരുന്ന പണം പിടിച്ചുപറിച്ചതിനും മറ്റൊരു യുവാവിനെ സംഘം ചേര്‍ന്ന് അക്രമിച്ചതിനും ഉള്ള കേസുകളില്‍ ഇയാള്‍ നേരത്തെ പിടിയിലായിരുന്നു.  പ്രതികളെ കോടതിയില്‍ ഹാജരാക്കി.