ഇസ്‌ലാമാബാദ്: പാകിസ്താനിലെ പരാചിനാറിലെ തിരക്കേറിയ മാര്‍ക്കറ്റിലുണ്ടായ ഇരട്ട സ്‌ഫോടനത്തില്‍ 25 പേര്‍ മരിക്കുകയും നൂറിലേറെ പേര്‍ക്ക് പരുക്കേല്‍ക്കുകയും ചെയ്തു. അഫ്ഗാനിസ്താനുമായി അതിര്‍ത്തി പങ്കിടുന്ന കുറം ഗോത്രവര്‍ഗ ജില്ലയിലാണ് പരാചിനാര്‍. അക്ബര്‍ ഖാന്‍ മാര്‍ക്കറ്റിലായിരുന്നു ആദ്യ സ്‌ഫോടനം. ഇഫ്താറിനും ഈദിനുമായി സാധനങ്ങള്‍ വാങ്ങാന്‍ തിങ്ങിക്കൂടിയവരാണ് സ്‌ഫോടനത്തില്‍ മരിച്ചത്.
ആദ്യ സ്‌ഫോടനത്തെ തുടര്‍ന്ന് രക്ഷാപ്രവര്‍ത്തനത്തിനായി എത്തിയവര്‍ കൂടിനില്‍ക്കേയായിരുന്നു രണ്ടാമത്തെ സ്‌ഫോടനം. 18 പേര്‍ മരിക്കുകയും 100 ഓളം പേര്‍ക്ക് പരുക്കേല്‍ക്കുകയും ചെയ്‌തെന്നാണ് ഔദ്യോഗിക റിപ്പോര്‍ട്ട്. മേഖലയിലെ ആശുപത്രികളില്‍ അധികൃതര്‍ അടിയന്തരാവസ്ഥ പ്രഖ്യാപിച്ചിരിക്കയാണെന്ന് പാക് മാധ്യമങ്ങള്‍ റിപ്പോര്‍ട്ട് ചെയ്തു. സുരക്ഷാ ഉദ്യോഗസ്ഥര്‍ മേഖല വളഞ്ഞിട്ടുണ്ട്. പരുക്കേറ്റവരെ ക്വറ്റ സിവില്‍ ആശുപത്രിയിലേക്ക് മാറ്റിയിരിക്കയാണ്.