കോഴിക്കോട്: നടക്കാവ് ഗവണ്‍മെന്റ് ഗേള്‍സ് വൊക്കേഷനല്‍ ഹയര്‍സെക്കന്‍ഡറി സ്‌കൂളിലെ പുതിയ ബ്ലോക്കിന്റെ ഉദ്ഘാടനം ഇന്ന് മൂന്നിന് മുഖ്യമന്ത്രി പിണറായി വിജയന്‍ നിര്‍വഹിക്കുമെന്ന് എ. പ്രദീപ്കുമാര്‍ എം.എല്‍.എ  വാര്‍ത്താസമ്മേളനത്തില്‍ അറിയിച്ചു. 2011 ല്‍ പ്രിസം പദ്ധതിയില്‍ നിന്ന് അനുവദിച്ച ഒരുകോടി 50 ലക്ഷം ചിലവഴിച്ചാണ് നിര്‍മാണം പൂര്‍ത്തീകരികരിച്ചത് . ഗ്രൗണ്ട് ഫ്‌ളോറില്‍ രക്ഷിതാക്കള്‍ക്കായി വിസിറ്റേഴ്‌സ് ലോഞ്ചും  രണ്ടാമത്തെ നിലയില്‍ നാല് ക്ലാസ് മുറികളും മൂന്നാമത്തെ നിലയില്‍ മ്യൂസിക് അക്കാദമിയുടെ ഭാഗമായി മ്യൂസിക്ക് തിയറ്ററും നിര്‍മിച്ചിട്ടുണ്ട് . അടിസ്ഥാന സൗകര്യങ്ങളുടെ കാര്യത്തില്‍ ഗവണ്‍മെന്റ് സ്‌കൂളുകളില്‍ ഏറ്റവും മികച്ച സ്‌കൂളായി ഈ വിദ്യാലയം മാറി കഴിഞ്ഞു . ഇത്തരത്തില്‍ എല്ലാ ഗവ. സ്‌കൂളുകളും അടിസ്ഥാന സൗകര്യങ്ങളുടെ  കാര്യത്തില്‍ മികവുറ്റതാക്കണമെന്ന് എ. പ്രദീപ് കുമാര്‍ എം.എല്‍.എ  അഭിപ്രായപ്പെട്ടു. നടക്കാവ് ഗവ. ഗേള്‍സ് വൊക്കേഷനല്‍ ഹയര്‍സെക്കന്‍ഡറി സ്‌കൂള്‍ പ്രധാന  അദ്ധ്യാപകന്‍ എന്‍. മുരളി , കെ. രതീഷ് , വി.പി ഷിജു എന്നിവരും വാര്‍ത്താസമ്മേളനത്തില്‍  പങ്കെടുത്തു.