ബാലരാമപുരം: ബാലരാമപുരത്ത് ഇന്നലെ സി.പി.എമ്മും-ബി ജെ.പി പ്രവര്‍ത്തകരും തമ്മില്‍ ഏറ്റുമുട്ടി. ബാലരാമപുരം-കാട്ടാക്കട റോഡില്‍ മുത്താരമ്മന്‍ കോവിലിന് സമീപത്താണ് സംഘര്‍ഷമുണ്ടായത്. പി.കെ.ശശികലയെ അറസ്റ്റ് ചെയ്തതില്‍ പ്രതിഷേധിച്ച് ബി.ജെ.പി.യുടെ നേതൃത്വത്തില്‍ മുത്താരമ്മന്‍ കോവിലിനു സമീപത്ത് നാമജപ ഉപവാസം നടക്കുകയായിരുന്നു. ഇതിനിടെ സി.പി.എമ്മിന്റെ നേതൃത്വത്തില്‍ എത്തിയ ജനമുന്നേറ്റ യാത്ര പ്രവര്‍ത്തകരുമായിട്ടാണ് സംഘര്‍ഷം നടന്നത്.
സംഘര്‍ഷത്തില്‍ രണ്ട് പൊലീസുകാര്‍ക്ക് പരുക്കേറ്റു. കാഞ്ഞിരംകുളം സ്റ്റേഷനിലെ എസ്.ഐ.പ്രതാപചന്ദ്രനും , എസ്.എ.പി ബറ്റാലിയനിലെ ശ്രീജിത്തിനുമാണ് പരുക്കേറ്റത്. ഇതില്‍ പ്രതാപചന്ദ്രന്‍ നെയ്യാറ്റിന്‍കരയി ലെ സ്വകാര്യ ആശുപത്രിയിലും ശ്രീജിത്ത് തിരുവനന്തപുരം മെഡിക്കല്‍ കോളജ് ആശുപത്രിയിലും ചികിത്സയില്‍ കഴിയുകയാണ്. സംഭവത്തില്‍ പൊലീസ് കേസെടുത്തിട്ടുണ്ട്. സംഭവ സമയം കൂടുതല്‍ പൊലിസ് എത്തി സ്ഥിതിഗതികള്‍ ശാന്തമാക്കി.