പുല്‍പ്പള്ളി: താഴെഅങ്ങാടി 117-ല്‍ മധ്യവയസ്‌കന്റെ കൊലപാതകവുമായി ബന്ധപ്പെട്ട് പൊലിസ് രണ്ടുപേരെ അറസ്റ്റ് ചെയ്തു. സംഭവത്തില്‍ ഉള്‍പ്പെട്ട ഒരു യുവതിയെ പൊലിസ് ഒഴിവാക്കിയത് സംശയത്തിന് ഇട നല്‍കിയിട്ടുണ്ട്.
വേലിയമ്പം നാമറ്റത്തില്‍ ജയ്‌മോന്‍(36), വേലിയമ്പം കുരഞ്ഞുവയല്‍ കോളനിയിലെ രാജന്‍ (32) എന്നിവരെയാണ് പൊലിസ് അറസ്റ്റ് ചെയ്തത്. സംഭവവുമായി ബന്ധപ്പെട്ട് കഴിഞ്ഞ തിങ്കളാഴ്ച മുതല്‍ ഇവര്‍ പുല്‍പ്പളളി പൊലിസിന്റെ കസ്റ്റഡിയിലായിരുന്നു. ഇന്നലെയാണ് അറസ്റ്റ് രേഖപ്പെടുത്തിയത്. ബത്തേരി കോടതിയില്‍ ഹാജരാക്കിയ ഇവരെ റിമാന്‍ഡ് ചെയ്തു.കൊലപാതകം സംബന്ധിച്ച് പൊലിസ് പറയുന്നത് ഇപ്രകാരമാണ്. സദാന്ദന്റെ വീടിനോടനുബന്ധിച്ച് അനാശാസ്യപ്രവര്‍ത്തനങ്ങള്‍ നടക്കാറുണ്ടായിരുന്നു. സംഭവദിവസം രാത്രി സ്ഥലത്തുണ്ടായിരുന്ന ഒരു സ്ത്രീയുമായി ബന്ധപ്പെട്ടുണ്ടായ തര്‍ക്കമാണ് കൊലപാതകത്തില്‍ കലാശിച്ചത്.
മദ്യലഹരിയിലായിരുന്ന സദാനന്ദന്‍ ആദ്യം രാജനെ ആക്രമിക്കുകയായിരുന്നു. തുടര്‍ന്ന് ജോമോനടക്കമുള്ളവര്‍ ചേര്‍ന്ന് സദാനന്ദനെ അടിച്ച് വീഴ്ത്തി കൊലപ്പെടുത്തുകയായിരുന്നു. രാജനെ പരുക്കുകളോടെ അന്നുതന്നെ പുല്‍പ്പള്ളി സര്‍ക്കാര്‍ ആശുപത്രിയില്‍ പ്രവേശിപ്പിച്ചിരുന്നു. രാജന് ഭാര്യയും രണ്ട് മക്കളുമുണ്ട്. ജയ്‌മോന്‍ അവിവാഹിതനാണ്.