മാനന്തവാടി: മദ്യശാലക്കെതിരേയുള്ള സമരങ്ങളില്‍ ജനപ്രതിനിധികളും ഉദ്യോഗസ്ഥരും ഇരട്ട നീതി കാണിക്കുന്നതായി ആരോപണം. പെരുവകയില്‍ മദ്യശാല സ്ഥാപിക്കുന്നതിനെതിരേ പ്രദേശവാസികള്‍ പ്രതിഷേധവുമായി രംഗത്തെത്തിയതോടെ ജനപ്രതിനിധികളും സമരസമിതി നേതാക്കളും മാനന്തവാടി സബ് കലക്ടര്‍ വി.ആര്‍ പ്രേംകുമാറുമായി ചര്‍ച്ച നടത്തി വിഷയം മന്ത്രിയുടെ ശ്രദ്ധയില്‍ പെടുത്താന്‍ തീരുമാനിച്ചിരുന്നു.
എന്നാല്‍ ആദിവാസി വിഭാഗത്തിന്റെ സമൂല നാശത്തിന് കാരണമാകുന്ന മാനന്തവാടി - വള്ളിയൂര്‍ക്കാവ് റോഡിലെ മദ്യശാലക്കെതിരേ ആദിവാസി അമ്മമാര്‍ നടത്തുന്ന 2016 ജനുവരി 27ന് ആരംഭിച്ച സമരം 515 ദിനങ്ങള്‍ പിന്നിട്ടിട്ടും ജനപ്രതിനിധികളോ ഉദ്യോഗസ്ഥരോ സമരക്കാരുമായി ചര്‍ച്ചക്ക് പോലും തയാറായിട്ടില്ല. മണ്ഡലം എം.എല്‍.എ ഉള്‍പെടെ സമരക്കാരോട് സംസാരിക്കാനോ പ്രശ്‌ന പരിഹാരത്തിനോ ഇതുവരെ നടപടിയെടുത്തിട്ടില്ല. സമരം തകര്‍ക്കാന്‍ ബെവ്‌കോ അധികൃതര്‍ നടത്തുന്ന നീക്കങ്ങള്‍ക്ക് പൊലിസ് പിന്തുണ നല്‍കുകയാണെന്നും ആരോപണമുണ്ടായിരുന്നു.
2016 ജനുവരിയില്‍ മദ്യശാല ആദിവാസികള്‍ക്ക് ഭീഷണിയാകുന്നുണ്ടെന്ന് പ്രമേയം പാസാക്കിയ മാനന്തവാടി നഗരസഭാ അധികൃതര്‍ ആഗസ്റ്റ് 11ന് മദ്യശാല പൂട്ടാന്‍ ജില്ലാ കലക്ടര്‍ ഉത്തരവിട്ടപ്പോള്‍ 12ന് മദ്യശാലക്ക് പുതിയ ലൈസന്‍സ് നല്‍കിയിരുന്നു.
കൂടാതെ ഉദ്യോഗസ്ഥ തലത്തില്‍ നടന്ന ചര്‍ച്ചയില്‍ സമരം ന്യായമാണെന്ന് നിലപാടെടുത്ത മാനന്തവാടി തഹസില്‍ദാറെ സ്ഥലം മാറ്റിയതിന് പിന്നില്‍ ഭരണകൂട - ഉദ്യോഗസ്ഥ അവിശുദ്ധ കൂട്ടുകെട്ടാണെന്നും ആക്ഷേപമുണ്ട്.
വയനാട്ടിലെയും മാനന്തവാടിയിലെയും എടവക ഗ്രാമപഞ്ചായത്തിലെയും 18 പട്ടികവര്‍ഗ കോളനികളെ അമിതമായ മദ്യാസക്തി കാരണം പട്ടിക വിഭാഗങ്ങള്‍ക്കെതിരായ അതിക്രമം തടയല്‍ നിയമം (1989) സെക്ഷന്‍ 17 പ്രകാരം പട്ടികവര്‍ഗ വിഭാഗങ്ങള്‍ക്കെതിരേ അതിക്രമത്തിന് സാധ്യതയുള്ള പ്രദേശങ്ങളായി 2016 ഓഗസ്റ്റ് ഒന്‍പതിന് മാനന്തവാടി സബ് ഡിവിഷനല്‍ മജിസ്‌ട്രേറ്റ് പ്രഖ്യാപിച്ചിരുന്നു. കൂടാതെ മാനന്തവാടിയിലെയും എടവക ഗ്രാമപഞ്ചായത്തിലെയും 18 പട്ടികവര്‍ഗ കോളനികള്‍ അമിത മദ്യോപഭോഗം കാരണം ആരോഗ്യപ്രശ്‌നങ്ങള്‍ നേരിടുന്നതായി 2016 ജൂലൈ 30ന് മാനന്തവാടി ട്രൈബല്‍ ഡെവലപ്‌മെന്റ് ഓഫിസര്‍ റിപ്പോര്‍ട്ട് ചെയ്യുകയും ചെയ്തിരുന്നു.
ഈ ആദിവാസി കോളനികളില്‍ മദ്യം ലഭ്യമാവുന്നത് മാനന്തവാടി ബിവറേജസ് ഔട്ട്‌ലെറ്റില്‍ നിന്നാണെന്ന് അധികൃതര്‍ കണ്ടെത്തുകയും ചെയ്തിരുന്നു. എന്നാല്‍ മദ്യശാല അടച്ചുപൂട്ടാന്‍ ഇതുവരെ സര്‍ക്കാരിന്റെ ഭാഗത്ത് നിന്ന് യാതൊരു നടപടിയുമുണ്ടായിട്ടില്ല. പൊതു സമൂഹത്തിന്റെ പിന്തുണയില്ലാത്തതാണ് സമരത്തെ സര്‍ക്കാര്‍ അവഗണിക്കാനുള്ള കാരണമെന്നാണ് പൊതുവിലയിരുത്തല്‍.