കൊയിലാണ്ടി: മത്സ്യബന്ധന ബോട്ട് കടലില്‍ മുങ്ങി. അപകടത്തില്‍പ്പെട്ടവരെ മത്സ്യതൊഴിലാളികള്‍ രക്ഷപ്പെടുത്തി.
വലിയമങ്ങാട് കിഴക്കെ പുരയില്‍ അമര്‍നാഥ് (20), വലിയമങ്ങാട് പുതിയ പുരയില്‍ ശ്യാം ശരത്ത് (26), വലിയ മങ്ങാട് ചാലില്‍ പറമ്പില്‍ കപില്‍ദേവ് (35) തുടങ്ങിയവരെയാണ് കൊയിലാണ്ടി താലൂക്ക് ആശുപത്രിയില്‍ പ്രവേശിപ്പിച്ചത്.
ഹാര്‍ബറില്‍നിന്ന് മത്സ്യബന്ധനത്തിനായി പോയ നെയ്‌റ എന്ന ബോട്ടാണ് പയ്യോളിക്കടലില്‍ മുങ്ങിയത്. ശക്തമായ കാറ്റില്‍പെട്ടതിനെ തുടര്‍ന്ന് ബോട്ടിന്റെ പലക ഇളകി പോവുകയും വെള്ളം കയറി കടലില്‍ താഴ്ന്നു പോവുകയുമായിരുന്നു.
വെള്ളം കയറിയതോടെ അതു വഴി പോവുകയായിരുന്ന സിന്ദൂരം ബോട്ടിലെ തൊഴിലാളികള്‍ എത്തിയാ ണ് തൊഴിലാളികളെ രക്ഷപ്പെടുത്തിയത്. ബോട്ട് പൂര്‍ണമായും കടലില്‍ മുങ്ങി. എട്ടു ലക്ഷത്തോളം രൂപയുടെ നഷ്ടം കണക്കാക്കുന്നു.