എരുമപ്പെട്ടി: സഹപ്രവര്‍ത്തകന് സ്‌നേഹ സാന്ത്വനം നല്‍കി ഡ്രൈവേഴ്‌സ് കൂട്ടായ്മ.
വാഹന അപകടത്തില്‍ പരുക്കേറ്റ് ചികിത്സയില്‍ കഴിയുന്ന എരുമപ്പെട്ടി മണ്ടംപറമ്പ് സ്വദേശി സജീവന് ഓള്‍ കേരളാ ഡ്രൈവര്‍ ഫ്രീക്കേഴ്‌സ് വാട്‌സ് ആപ് ആന്‍ഡ് ഫെയ്‌സ് ബുക്ക് കൂട്ടായ്മ ധനസഹായം നല്‍കി.
ഒരുമാസം മുമ്പ് സേലത്ത് വെച്ചുണ്ടായ വാഹന അപകടത്തിലാണ് സജീവന് പരുക്കേറ്റത്. നട്ടെല്ലിനും കാലിന്റെ എല്ലിനും പൊട്ടലുണ്ടായതിനെ തുടര്‍ന്ന് സജീവനെ തൃശൂരിലെ സ്വകാര്യ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചിരുന്നു.
എഴുന്നേറ്റ് നടക്കാന്‍ കഴിയാത്തതിനാല്‍ ഇപ്പോള്‍ വീട്ടില്‍ കിടന്നാണ് ചികിത്സ തുടരുന്നത്. ഈ സാഹചര്യത്തിലാണ് ഡ്രൈവേഴ്‌സ് വാട്‌സ് ആപ് ആന്‍ഡ് ഫെയ്‌സ് ബുക്ക് കൂട്ടായ്മയായ എ.കെ.ഡി.എഫ് സജീവന് സഹായവുമായി എത്തിയത്. സംസ്ഥാന വ്യാപകമായുള്ള സംഘടനയുടെ ജില്ലാ കമ്മിറ്റിയാണ് ധന സമാഹരണം നടത്തിയത്. സംസ്ഥാന, ജില്ലാ അഡ്മിന്‍മാര്‍ സജീവന്റെ വീട്ടിലെത്തി ഒരു ലക്ഷം രൂപയുടെ ചെക്ക് കൈമാറി. അനീഷ് എറണാംകുളം, മെജോ ആലപ്പുഴ, ധനൂപ് തൃശൂര്‍, ദീപു എരുമപ്പെട്ടി, ഷെഫീക്ക് കുന്നംകുളം, റിയാസ് കുര്‍ക്കഞ്ചേരി, വഹാബ് മണ്ണുത്തി ചടങ്ങില്‍ പങ്കെടുത്തു.