കൊണ്ടോട്ടി: ലാത്തിയും തോക്കും പിടിക്കുന്ന കൈകളില്‍ കൈക്കോട്ടും അരിവാള്‍ കത്തിയും കണ്ട് സ്റ്റേഷനിലെത്തിയവര്‍ ആദ്യം അമ്പരന്നു. പിന്നീടാണ് കാര്യങ്ങള്‍ പിടികെട്ടിയത്.പകര്‍ച്ചവ്യാധി പടരുന്നത് തടയാന്‍ പൊലിസ്‌റ്റേഷന്‍ ശുചീകരിക്കാനാണ് ഇന്നലെ സര്‍ക്കിള്‍ ഇന്‍സ്പക്ടറും സബ് ഇന്‍സ്പക്ടറും അന്‍പതോളം പൊലിസുകാരും രംഗത്തിറങ്ങിയത്.
ഇത് കൊണ്ടോട്ടിക്കാര്‍ക്ക് പുത്തന്‍ അനുഭവമായി. കഴിഞ്ഞ ദിവസം നഗരസഭാ അധികൃതരും ആരോഗൃ വകുപ്പ് ഉദ്യോഗസ്ഥരും പൊലിസ് സ്‌റ്റേഷന്‍ സന്ദര്‍ശിച്ചിരുന്നു.സര്‍ക്കിള്‍ ഇന്‍സ്പക്ടറുമായി സംസാരിച്ച് സ്ഥാപന ശുചീകരണത്തിന് പദ്ധതി ആവിഷ്‌കരിച്ചു. തൊണ്ടി മുതലായി പിടിച്ചെടുത്ത വാഹനങ്ങളും മറ്റ് കൊതുകിന്റെ ഉറവിടങ്ങളും നീക്കം ചെയ്യാനും തീരുമാനിച്ചു. സര്‍ക്കിള്‍ ഇന്‍സ്പക്ടര്‍ സി മുഹമ്മദ് ഹനീഫ ശുചീകരണ പ്രവൃത്തി ഉദ്ഘാടനം ചെയ്തു. സബ് ഇന്‍സ്പക്ടര്‍ സാബു, എ.എസ്.ഐ പീതാംബരന്‍ നേതൃത്വം നല്‍കി.